Михаил Мишустин Башҡортостан күргәҙмәһен ҡараны

Башҡортостан Хөкүмәте Премьер-министры Андрей Назаров Рәсәй Хөкүмәте Рәйесе Михаил Мишустинға Башҡортостан күргәҙмәһен күрһәтте. Ул ВДНХ-лағы “Рәсәй” күргәҙмә-форумын БДБ илдәре хөкүмәттәре башлыҡтары менән ҡараны, Берҙәмлек илдәре менән хеҙмәттәшлек барышын баһаланы. Башҡортостан Хөкүмәте Премьер-министры коллегаларына “Амкодор-Ағиҙел” иген киптереү ҡорамалдарын етештереү буйынса башҡорт-белорус предприятиеһы тураһында һөйләне. Ул төбәк Үҫеш корпорацияһы көсө менән туғыҙ ай эсендә төҙөлдө. Завод “Өфө” индустриаль паркында урынлашҡан. Быйыл июндә Рәсәй Хөкүмәте Ҡарары тарафынан индустриаль парк биләмәһе “Алға” айырыуса иҡтисади зона составына индерелде. Һөҙөмтәлә биләмәһе 763 гектар тәшкил итте. “Амкодор-Ағиҙел” предприятиеһы айырыуса иҡтисади зона бишенсе майҙансығының тәүге резиденттарының береһе булды. Презентацияла булған Беларусь Республикаһы Премьер-министры Роман Головченко объекттың юғары тиҙлек менән төҙөлөүен билдәләне. - “Амкодор-Ағиҙел” продукцияһына заказдар ике йыл алдан яҙылған. Ауыл хужалығы хеҙмәткәрҙәре өсөн мотлаҡ ҡоролманы Башҡортостанда ғына түгел, Ырымбур, Силәбе өлкәләрендә, Ҡаҙағстанда көтәләр. Һеҙҙең ҡушыуығыҙ буйынса, Михаил Владимирович, ыңғай тағы белорустар менән бергә предприятиеның “Амкодор- Алға” заводының беренсе ташын һалдыҡ. 42 мең квадрат метр майҙанда грейдерҙар, бульдозерҙар, экскаваторҙар етештерәсәкбеҙ. Был заводты 2024 йылда күтәрмәксебеҙ. Уны асыу тантанаһына Һеҙҙе лә саҡырабыҙ, - тине Андрей Назаров. Башҡортостан Хөкүмәте Премьер-министры бергә проекттар һаны буйынса Беларусь Республикаһының - 1-се, Ҡаҙағстандың 2-се партнер икәнлеге хаҡында әйтте. Шулай уҡ тағы масштаблы инвестиция проектының – Сибай – Подольск – Новорудная тимер юлы төҙөлөшөн тормошҡа ашырылыуы тураһында белдерҙе. Ул Силәбе тимер юлына көсөргәнеште кәметәсәк һәм Ҡаҙағстанға юлды 250 километрға ҡыҫҡартасаҡ. Фото, сығанаҡ: https://pravitelstvorb.ru/news/22564/