Ирекмәндәрҙең йәше мөһим түгел

18 декабрҙә Башҡортостан Башлығы Радий Хәбиров аҙналыҡ оператив кәңәшмәлә республиканың дәүләт наградаларын тапшырҙы. Башҡортостандың Почет грамотаһы менән Ҡыуатов исемендәге Республика клиник дауаханаһының хирургия ярҙамы буйынса баш табибы урынбаҫары Антон Сафонов бүләкләнде. Хәтерегеҙгә төшөрәбеҙ, 2023 йылдың июлендә ул операция мультидисциплина бригадаһын етәкләй, ул пациентҡа ҡан тамырҙары һәм артериялар шытып сыҡҡан шеште алып ташлай. – Антон Сергеевич уникаль операциялар үткәрә, иң ҡатмарлы осраҡтарға тотона. Быйыл ул республиканың “Иң яҡшы онкологы” булды, абруйлы “Алтын скальпель” премияһын алды, – тип билдәләне Радий Хәбиров. Шулай уҡ 5 декабрҙә Рәсәйҙә билдәләнгән Ирекмән көнө уңайынан төбәк Башлығы Донбасста йәшәүселәргә һәм махсус хәрби операцияла ҡатнашыусыларға әүҙем ирекмәнлек эшмәкәрлеге, гуманитар конвойҙар булдырыуҙа һәм оҙатыуҙа ярҙам иткәне өсөн “Башҡортостан Республикаһының ирекмәне” почёт билдәләрен тапшырҙы. Бүләкләнеүселәр иҫәбендә – мәҙәниәт ирекмәндәре, ирекмәндәр-медиктар, “шайморатовсылар”, студенттар һәм уҡыусылар. “Еңеү ирекмәндәре” Бөтә Рәсәй йәмәғәт хәрәкәтенең Башҡортостан бүлексәһе төбәк етәксеһе Тимур Ишҡарин республика етәкселегенә ярҙам күрһәткән өсөн рәхмәт белдерҙе. - Беҙҙең Башҡортостанда битараф булмаған кешеләр бик күп. Улар - ололар ҙа, йәш ирекмәндәр ҙә. Беҙ, йәштәр, беҙҙең өлкән быуындан тәжрибә үҙләштерәбеҙ, - тине Тимур Ишҡарин. - Башҡортостан ирекмәндәре республика алдында торған барлыҡ саҡырыуҙарға һәр саҡ яуап бирә. Былар коронавирусҡа ҡаршы көрәш ваҡытында ярҙам да, урман янғындарын һүндереүҙә булышлыҡ итеү ҙә. Хәҙер беҙҙең алда яңы саҡырыу - ул хәрби хеҙмәткәрҙәргә һәм уларҙың ғаилә ағзаларына ярҙам итеү. Радий Фәрит улы, һеҙ һәр саҡ беҙгә таяна алаһығыҙ. Бүләкләнгәндәрҙең береһе – видеоконференция режимында бәйләнешкә сыҡҡан һәм Туймазы районы хакимиәте башлығы Айҙар Суфиянов ҡулынан награда алған көмөш йәштәге ирекмән Валентина Арефьева. 88 йәшлек Валентина Николаевна Ленинградта тыуған. Блокаданы үтә, Нева буйындағы ҡаланы азат иткәндән һуң, Башҡортостанға күсеп килә. Бында ул кейәүгә сыҡҡан, өс бала үҫтергән. Туймазы ит комбинатында һәм дарыуханала кассир булып эшләй. Хатта пенсияла ла әүҙем гражданлыҡ позицияһын биләй. Коронавирус пандемияһы ваҡытында Валентина Николаевна ирекмәндәр штабына пенсияһының бер өлөшөн мохтаждарға ярҙам итеү өсөн килтерә. Был аҡсаға һигеҙ ғаиләгә аҙыҡ-түлек һатып алғандар. МХО осоронда ул шулай уҡ яугирҙәргә аҙыҡ-түлек йыйылмаһы һатып алыу өсөн аҡсаларының бер өлөшөн тапшырҙы. - Был награданы алыу минең өсөн ҙур бәхет. Һеҙгә ҙур рәхмәт, - тине Валентина Арефьева. - Беҙ барыбыҙ ҙа һеҙгә изгелегегеҙ һәм кешеләргә ярҙам иткәнегеҙ өсөн рәхмәт белдерәбеҙ. Оҙон ғүмер һәм ныҡлы һаулыҡ теләйбеҙ, – тине Радий Хәбиров. Фото: Башҡортостан Башлығы сайты.