Хәбәр итеүебеҙсә, Башҡортостандың атҡаҙанған матбуғат һәм киң мәғлүмәт саралары хеҙмәткәре, Рәсәйҙең һәм Башҡортостандың Журналистар союзы ағзаһы Рәмзиә Кәримова тыуған ауылында - Әбйәлил районы Әбделмәмбәт урта мәктәбендә китап уҡырға яратҡан, яҙышҡан, уҡыуҙа һәм йәмәғәт эштәрендә һынатмаған уҡыусыларға үҙенең премияһын булдырған ине. Үткән йылда өс уҡыусы премияға лайыҡ булһа, быйыл да иң шәп өс уҡыусы шәп премия менән билдәләнгән. Был хаҡта Рәмзиә Кәримова үҙенең "Бәйләнештә"ге сәхифәһендә яҙған. "Тыуған мәктәбемдә, Әбйәлил районы Әбделмәмбәт ауылында, премиямды быйыл да тапшырырға насип булды. Үҙемдең премиямды тырышып уҡыған, телде, әҙәбиәтте яратҡан уҡыусылар өсөн былтыр булдырғайным. Йәш яҡташтарым араһында лайыҡлы уҡыусылар күп булыуына шатмын, киләсәктә лә осрашырға яҙһын! 2023 йыл лауреаттары:1. Күсәрбаев Фидан Филат улы, 9-сы класс;2. Диярова Рита Марс ҡыҙы, 8-се класс;3. Таһирова Дарина Рөстәм ҡыҙы, 7-се класс", - тип яҙған ул. Атайсалға файҙалы эштәр йылында Рәмзиә Кәримова үҙенең мәктәбе өсөн бик файҙалы һәм изге ғәмәл башҡарып та ҡуйҙы. Афарин, Рәмзиә! Ҡылған изге ғәмәлдәрең үҙеңә лә йөҙләтә әйләнеп ҡайтһын! Фото: Рәмзиә Кәримова.