Радий Хәбиров Мәсәғүт һөт-консерва комбинатының үҫеш мөмкинлектәрен тикшерҙе

29 декабрҙә Дыуан районына эш сәфәре барышында Башҡортостан Башлығы Радий Хәбиров Мәсәғүт һөт-консерва комбинатының эшмәкәрлеге менән танышты. Предприятие 1948 йылдан алып уңышлы эшләп килә, май, киптерелгән һөт, эремсек һәм башҡа һөт продукцияһы - йәмғеһе 30-ҙан ашыу ризыҡ әҙерләп сығара. Дәүләт ярҙамы сиктәрендә 2023 йылда ғына предприятие һөт эшкәртеүгә 12 миллион һум самаһы субсидия алған. Башҡортостан Башлығына Рәсәй һәм халыҡ-ара агросәнәғәт күргәҙмәләрендә дипломдарға лайыҡ булған продукцияның яңы ассортиментын, шул иҫәптән глазурланған сырҙарҙы һәм эремсекле тортты күрһәттеләр. Радий Хәбиров Мәсәғүт һөт-консерва комбинатын артабан үҫтереү мөмкинлектәре менән ҡыҙыҡһынды. Предприятиеның генераль директоры һөйләүенсә, киләсәктә комбинат биләмәһендәге 3,5 мең квадрат метр майҙанлы ташландыҡ бинаны яңыртырға һәм унда яңы производство асырға ниәтләйҙәр. Башҡортостан Башлығы был проектты «Инвестиция сәғәт»тәренең береһендә тикшерергә тәҡдим итте. Фото: glavarb.ru