“Һаулыҡ һаҡлау” милли проектының тәүге звеноны яңыртыу программаһына ярашлы, Талбазы үҙәк район дауаханаһына яңы компьютер томографы ҡуйылды. Аппаратты урынлаштырыуҙың һуңғы этабы менән һаулыҡ һаҡлау министрының беренсе урынбаҫары Роберт Иштуков һәм район хакимиәте башлығы Арыҫлан Шәһәретдинов танышты. Техниканы урынлаштырыу өсөн терапия корпусында биналарҙы ремонтлау һәм үҙгәртеп ҡороу эштәре башҡарылған. Аҙаҡ рентген лаборанттарын һүрәттәр төшөрөү күнекмәләренә өйрәтеү планлаштырыла. Рөхсәт итеү документтарын алыу менән кабинет эш башлаясаҡ. –Компьютер томографында тикшереү сирҙәрҙе иртә стадияла диагностикаларға мөмкинлек бирәсәк. Шулай уҡ медицина ярҙамынан файҙаланыу мөмкинлеген арттырасаҡ, – тип билдәләне Талбазы дауаханаһының баш табибы Азат Ҡотоев. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.