15 декабрҙә Баймаҡ районында Башҡортостан Башлығы Радий Хәбиров 1-се Төркмән ауылының урта мәктәбендә булды. 2023 йылда ул Рәсәй Президенты Владимир Путин башланғысы менән үткәрелгән «Мәктәп белем биреү системаларын модернизациялау» федераль программаһы буйынса ремонтланған. Мәктәпте яңыртыуға 47 миллион һум самаһы йүнәлтелгән, шуның 39 миллионы - федераль ҡаҙнанан. Төҙөүселәр ҡыйыҡты алмаштырған, фасадын көпләгән, биналарҙы эске яҡтан биҙәгән, иҙәндәрен, инженер селтәрҙәрен яңыртҡан, аҙыҡ-түлек блогын ремонтлаған. Шулай уҡ биләмә янын төҙөкләндереү буйынса эштәр башҡарылған - ҡоймалар яңыртылған, юлдарға асфальт түшәлгән, урам яҡтыртҡыстары ҡуйылған. Өҫтәмә рәүештә уҡыу йортон йыһазландырыуға - мебель, һанлы ҡорамалдар, спорт тауарҙары һәм ашхана техникаһы һатып алыуға алты миллион һум бүленгән. Радий Хәбиров башҡорт теле класында булды, сенсор класын, ашхана, тамашалар һәм волейбол күнекмәһе барған спорт залын ҡараны. Уҡыусылар һәм уҡытыусылар Башҡортостан Башлығына уҡыу һәм эшләү өсөн заманса уңайлы шарттар тыуҙырылғаны өсөн рәхмәт белдерҙе. - Мин бында ике йыл самаһы булғанда, нисек уҡығанығыҙҙы күргәндән һуң ремонт эшләргә тәҡдим иттем. Хәҙер һеҙҙә яңы матур мәктәп. Директорығыҙға, уҡытыусыларығыҙға рәхмәт, - тине Радий Хәбиров. - Яҡшы уҡығыҙ. Тап ошондай ауылдарыбыҙҙан, бәләкәй ҡалаларыбыҙҙан бөйөк ғалимдар, рәссамдар, етәкселәр барлыҡҡа килә. Барығыҙға ла уңыштар теләйем. Алға барығыҙ, ә беҙ был тормошта һеҙгә ярҙам итербеҙ. Барыһы ла килеп сыҡһын! – тине Радий Хәбиров уҡыусылар менән осрашҡанда. Башҡортостандың мәғариф министры Илдар Мәүлитбирҙин һүҙҙәренсә, 2023 йылда белем биреү йорттарын капиталь ремонтлау президент программаһы буйынса республика мәктәптәренең 77 бинаһы йүнәтелгән. Был маҡсатҡа федераль бюджеттан 4,3 миллиард һум йәлеп ителгән. 2022 йылдан Башҡортостанда бөтәһе 140 мәктәп бинаһы ремонтланған. 2024 йылға тағы 31 белем биреү учреждениеһында капиталь ремонт башлау планлаштырылған. Радий Хәбиров 2007 йылдан алып ошонда эшләгән мәктәп автобусы водителе Әхсән Халиҡов менән дә аралашты. Хәҙер ул балаларҙы өр-яңы автобуста йөрөтә. Республика башлығы уға башҡарған эше өсөн рәхмәт белдерҙе. Илдар Мәүлетбирҙин һүҙҙәренсә, 2023 йылда Башҡортостан федераль һәм төбәк ҡаҙнаһы иҫәбенә 67 мәктәп автобусы һатып алған. Республикала 2 638 тораҡ пункттан 876 мәктәптең 52 206 уҡыусыһын мәктәпкә алып барыу һәм кире алып ҡайтыу ҡаралған. Был маҡсаттарға 1 523 мәктәп автобусы йәлеп ителгән. Фото: БР Башлығы сайтынан.