Декабрьнең беренче ункөнлегендә билгеләп үтелә торган календарьдагы тарихи даталар — Билгесез солдат һәм Ватан геройлары көннәре уңаеннан Җиңү паркында митинглар узды.
«Солдат уйлары» һәйкәле янында Билгесез солдат көненә багышланган чарага җыелган шәһәр халкы алдында чыгыш тоткан шәһәр хакимияте башлыгы Алексей Пальчинский һәр чорның үз каһарманнары булуын һәм аларның буыннар хәтерендә озак яшәячәген ассызыклады.
— Ватан каһарманнары көне хәзерге Русия өчен мөһим дата. Бу көнне без үз батырларыбызны хөрмәтлибез, аларга дан җырлыйбыз. Ватан каһарманнары көне шунысы белән дә зур әһәмияткә ия — ул Русия барлыкка килгән вакыттан алып бүгенге көнгәчә хәрби батырлыклар тарихын берләштерә. Октябрьскийлылар үз якташлары белән горурлана ала. Алар арасында — биш Советлар Союзы Герое, ике Дан орденының тулы кавалеры һәм бер Русия Герое, — диде Алексей Евгеньевич. — Кызганычка, бүгенге хәрби вәзгыять тә югалтуларсыз узмый. Махсус хәрби операция барышында һәлак булган Ватанны саклаучыларның батырлыгы безнең тарих битләренә канлы юллар белән язылып калачак. Алар — чын каһарманнар! Бу дәвердән соң көннәр, еллар, гасырлар — никадәр генә вакыт узмасын, аларның исемнәре, алар кылган батырлыклар кешелек хәтерендә мәңге сакланып калачак.
Илебезне дошман һөҗүменнән азат итүчеләргә — Ватан геройлары, хәбәрсез югалган һәм исемнәре билгеле булмаган сугышчылар истәлегенә багышланган митингны шәһәрнең хәрби комиссары подполковник Валерий Шәрифуллин дәвам итте:
— Ватан каһарманнары көне — ул безнең илнең горурлык символы. Русияне дошманнан яклап, аның фидакарь уллары һәрвакыт кулларына корал алган. Хәзерге вакытта да Ватан ирләре алгы сызыкта тора. Һәм әлеге кыю якташлар арасында Дан ордены тулы кавалерының оныгы да бар. Ул бабасы үрнәгендә үз теләге белән фронтка китте һәм Ватан алдындагы үз бурычын намус белән үти. Башкача була да алмый. Ватанның кыю уллары — ул Туган илгә мәхәббәт һәм тугрылык үрнәге.
Истәлекле даталар белән бәйле чаралар кораллы низагларда һәлак булган хәрбиләр истәлегенә куелган мемориаль янында дәвам итте.
— Һәр чор үз геройларын тудыра. Ләкин, кешенең иң яхшы сыйфатларын үз эченә туплап, сугыш батырлыгы һәрвакытта да югары әхлакый пьедесталда тора — митингта яңгыраган сүзләрдә никадәр хаклык. Алар һәр йөрәктә кайтаваз булып яңгырагандыр.
9 декабрь — Ватан каһарманнары көне. Канлы низагларда һәлак булган хәрбиләр истәлегенә куелган мемориалда моңа кадәр Әфган һәм Чечня сугышларында гомерләре өзелгән якташларыбызның гына исемнәре язылган истәлек такталары эленеп торса, соңгы бер елдан артык вакыт эчендә биредә тагын ике такта барлыкка килде — аларда Донбасс өчен бара торган махсус операциядә җиңү хакына башларын салган хәрби хезмәткәрләрнең исемнәре уелган.
— Хәрби бурычларын үзләренең ата-бабалары рухына лаеклы итеп үтәгән шәһәребезнең кыю уллары — ул ватанпәрвәрлек үрнәге. Без алар белән горурланабыз, алар үрнәгендә яшь буынны тәрбиялибез. Хәтер яшәгәндә батырлар да яши, алар истәлеге югалмый, буыннардан-буыннарга якты һәм кадерле ядкарь итеп тапшырыла, — дип билгеләп үтте шәһәр хакимияте башлыгы Алексей Пальчинский.
Октябрьскийлылар Ватан каһарманнарын бер минут тын калып искә алды. Митингта катнашучылар һәйкәлләргә тере чәчәкләр салды.
Илмира ГАЛИЕВА
Автор фотолары