Һүҙем район үҙәге Бүздәктәге 2-се мәктәптә белем алған ағалы-ҡустылы Арсен һәм Алмаз Дистановтар тураһында. Арсен 8-се класта тик "бишле"гә генә уҡый, Алмаз агро-инженер класында белем ала. Уларҙы уртаҡ ҡыҙыҡһыныу берләштерә – икеһе лә каникулда ҡарағат, ҡурай еләге, мәтрүшкә кеүек файҙалы үләндәрҙе йыйыу, киптереү менән мәшғүл. Алмаздың агрокласта уҡыуы ла ошондай шөғөлгә ҡыҙыҡһыныу уятҡандыр. Ул хатта ошо тема буйынса ғилми-тикшеренеү эше лә башҡарған. Ә быйыл улар сейә япраҡтарын ферментлап та ҡараған. Егеттәр төрлө күргәҙмәләрҙә лә әүҙем ҡатнаша. Бүздәктә үткән “Ҡатын-ҡыҙ бәхете биләмәһе” тигән сарала үҙҙәренең продукцияһын “һә” тигәнсә һатып бөтәләр һәм эшләнгән аҡсаға йүнсел туғандар мәктәптәренә район флагын бүләк итәләр. ”Бәлеш-фест” фестивалендә үләндәрен “Башҡортостан оҙон ғүмерлелеге” туры менән килгән оло йәштәгеләргә таратҡандар, ошо рәүешле өлкән йәштәгеләрҙең күңелен күргәндәр. Әйткәндәй, егеттәр өйҙә лә яҡындарын үҙҙәре йыйып киптергән хуш еҫле үләндәр менән һыйлай. Арсен һәм Алмаздың ҡыҙыҡһыныуҙары төрлө, китапты ла күп уҡыйҙар. Өйҙәрендәге шәхси китапханала ғына 500-ҙән ашыу китап булыуы уларҙың белемгә ынтылыусан ғаилә булыуы тураһында һөйләй. Был ғаиләлә һәр тыуған көнгә энциклопедиялар бүләк итеп матур ғәҙәткә ингән. Киләсәктә егеттәр медицина юлынан китергә уйлай. Быға медицина өлкәһендә хеҙмәт иткән өлкән апайҙары Аделия ла өлгө булып тора. Атай-әсәйҙәренең генә түгел мәктәптең, райондың ғорурлығы ул ошондай һәләтле балалар. Фото: шәхси альбомдан.