“Ҡатын иланы, һеңлем әрләне, улым аңланы...”

Эльдар былтыр июнь айында уҡ махсус хәрби операция зонаһына үҙ теләге менән китә. Тәүҙә ул Алкинда, Доставалов исемендәге батальон формалашҡан урында, хеҙмәт итә. Аҙаҡ Түбәнге Новгород эргәһендә хәрби әҙерлек үтә. Туғыҙ ай эсендә төрлө фронттарҙа һуғышырға өлгөрә, ике тапҡыр яралана. Тәүгеһе еңелсә үтһә, икенсеһендә аяҡтары миномет утынан яралана һәм уны хеҙмәткә яраҡһыҙ тип табалар. –Беҙҙе хеҙмәткә яҡшы әҙерләнеләр, техника ла етерлек ине. Башҡортостан бына тигән бронежилеттар менән тәьмин итте. Ни өсөн үҙ теләгегеҙ менән алғы һыҙыҡҡа ашҡындығыҙ, тиһегеҙме? Сөнки беҙ унда кәрәк инек. Хәлдең етдилеген күрҙек, оборонаны взводыбыҙ менән нығытҡас, бер аҙ тотороҡлоҡ урынлашты, – ти ул. –Ә яҡындарығыҙ ҡарарығыҙҙы нисек ҡабул итте? –Төрлөсә. Ҡатын иланы, һеңлем “иҫәр” тине, улым ғына бөтәһен дә аңланы. Ә атай-әсәйемә тәүҙә бер ни ҙә өндәшмәнем. Мин эске ғәскәрҙәр кесе сержанты, ике йыл хеҙмәт иттем, хәрби колонналарҙы һаҡланым. Ниндәй булһа ла, тәжрибәм бар. Дошмандың кем, нимәгә һәләтле булыуын аңлайым. Мине шунда уҡ взвод командиры урынбаҫары итеп ҡуйҙылар, офицерҙар етешмәүе асыҡланды. Кеше һуғыш шарттарына тиҙ өйрәнә. Яңы ғына егеттәр менән һөйләштем, кәйефтәре күтәренке. Окоп шарттарына, һыуыҡҡа, бысраҡҡа кеше күнегә ул. Башҡортостандан гуманитар ылауҙар килеп тора, был яҡтан бик яҡшы. –Алғы һыҙыҡҡа барырға теләгәндәргә ни әйтер инең? –Махсус хәрби операция зонаһы бөтөнләй башҡа донъя, ул башҡа үлсәмдә йәшәй кеүек. Унда ҡиммәттәр ҙә башҡа. Һинең тәртибеңә, тотошоңа башҡаларҙың ғүмере бәйләнгәндә, уларҙың мөнәсәбәтенән һинең тормошоңдоң нисек булыуы торғанда, бер котелоктан бергәләп ашағанда, донъяға ҡарашың да тамырынан үҙгәреүе мөмкин, – ти Эльдар. Фото:https://vk.com/srgazeta