Владимир Путин: “Ватанды һаҡлаусылар” фонды һәйбәт эшләй

Бөгөн Рәсәй Президенты Владимир Путин ил халҡы менән тура бәйләнештә аралаша. Ул “Ватанды һаҡлаусылар” фонды эшенә айырым иғтибар итте. “Ватанды һаҡлаусылар” фондына килгәндә. Яҡшы эшләй. Унда бик һәйбәт кешеләр йыйылған. Эйе, кешеләр шәп. Бик позитив эш алып баралар. Фонд эшмәкәрлеген камиллаштырасаҡбыҙ. Һәм был хәрби хәрәкәттәрҙә ҡатнашыусы егеттәребеҙҙең мәнфәғәттәрен яҡлау буйынса һәйбәт, йоғонтоло инструмент булыуына өлгәшәсәкбеҙ”, – тине Президент. Фонд эшләй башлағандан алып 422 000 самаһы мөрәжәғәт килгән, уларҙың 334 000-дән ашыуы хәл ителгән. Башҡортостан Республикаһындағы “Ватанды һаҡлаусылар” фонды филиалы махсус хәрби операция ветерандары һәм һәләк булғандарҙың ғаиләләре менән әүҙем һәм даими эш алып бара. Фронттан ҡайтҡан һәр Башҡортостан кешеһенә төрлө мәсьәләләрҙе хәл итеү процесында уны оҙатып йөрөүсе социаль координатор беркетелгән. “Ватанды һаҡлаусылар” фондының Башҡортостандағы филиалы етәксеһе Гөлнур Ҡолһарина, фондтың филиалы асылғандан алып алты ай эсендә байтаҡ эш башҡарылды, тип билдәләне. – Ошо осорҙа филиалға туғыҙ меңдән ашыу кеше мөрәжәғәт итте, 14 меңдән күберәк мөрәжәғәт килде. Шуларҙың 13 меңдән ашыуы хәл ителгән. Төп мәсьәләләр – ул ярҙам сараларын тәғәйенләү; хәрби хәрәкәттәр ветераны танытмаһын алыу; юридик һәм медицина ярҙамы; махсус хәрби операцияла ҡатнашыуға бәйле федераль һәм төбәк түләүҙәре. Башҡортостанда социаль координаторҙарҙың һаны ярайһы уҡ артты. Әгәр июндә улар 40 кеше булһа, бөгөнгө көнгә фонд филиалында 97 социаль координатор эшләй. Бөгөнгә республиканың барлыҡ муниципалитеттары социаль координаторҙар менән тәьмин ителгән. Махсус хәрби операция ветерандарына һәм унда ҡатнашыусыларға ярҙам күрһәтеү буйынса эште артабан да дауам итәсәкбеҙ. Геройҙар һәм уларҙың ғаиләләре тураһында хәстәрлек күреү әлеге ваҡытта беҙҙең иң мөһим бурыс, – тине Гөлнур Ҡолһарина. Фото: Г. Ҡолһаринаның шәхси архивынан.