Ағиҙел ҡалаһында йәшәгән ҡатын ире менән күрешеү өсөн махсус хәрби операция зонаһына юлланған. Был хаҡтағы хәбәр социаль селтәрҙә киң таралғас, һәр кем уның был тәүәккәл аҙымға ни өсөн барырға теләүен белергә тырышты, ти яҙа “Огни Агидели”. Еленаның һөйләүенсә, уларҙың мөхәббәте ҡыҙға 16 йәш, ә буласаҡ иренә 19 тулғанда башланған.Ҡыҙ ауылға өләсәһенә ҡунаҡҡа килгәндә, егет армиянан ҡайтҡан. Йәштәр клубта таныша, биш йыл буйы дуҫлашып йөрөгәндән һуң өйләнешергә ҡарар итәләр. Хәҙер уларҙың Арина исемле ҡыҙҙары үҫә. Еленаның ире былтыр өлөшләтә мобилизация барышында хеҙмәткә алына. Ул быға тиклем электр монтеры булып эшләгән була. Ун айҙан һуң ҡыҫҡа ваҡытлы ялға ҡайтып китә. –Мин ирем янына барып бер күрешеү өсөн бөтә мөмкинлектәрҙе эҙләнем. Тәүҙә хәрби әҙерлек урынына барырға уҡталдым, тик алманылар. Гуманитар ылау менән бергә китеү планы ла килеп сыҡманы. Шулай булғас, бер генә юл ҡалғанын аңланым –үҙаллы сәфәргә сығырға кәрәклеген, – ти ҡатын. Еленаның утыҙ йәшен бергә үткәреү теләген ире лә хупламай, “бында бик хәүефле”, ти. Әммә ул яйлап ирен күндерә. Тик ата-әсәһе аяҡ терәп ҡаршы төшә. Бер аҙҙан әсәһе йомшара, ҡыҙының һөйгәнен күреү өсөн ер сигенә китергә әҙер булыуына ризалыҡ бирә, уға юлға әҙерләнергә, күстәнәс, йылы кейем-һалым тупларға ярҙам итә. – Билдәһеҙ, таныш булмаған ер аяғы-ер башына сығып китеүе анһат булманы. Ҡурҡыу тойғоһо көслө ине. Әммә осрашыу теләге барыһын да еңде. Ростовҡа тиклем тәүлектән ашыу поезда барҙым, аҙаҡ 430 километрлыҡ араны юлда осраған машинаға ултырып үттем. Комендант сәғәтенә тиклем барып етергә кәрәк булғас, водитель ҡыҫҡа юлдан барырға тәүәккәлләне. Һәр блокпоста туҡтаттылар, документтарҙы тикшерҙеләр, сәфәр сәбәбен һораштылар. Шулай ҙа беҙ һуңланыҡ, комендант сәғәте башланғайны, – ти Елена.– Ирем менән тыуған көнөмдө бергә билдәләнек. Уның йәшәү, хеҙмәт шарттары менән таныштым. Мөмкин булһа, ошонда үҙем дә ҡалыр инем. Тик мин бер кемде лә бындай тәүәккәл аҙымға барырға саҡырмайым, әммә яҡын кешеләрен күрергә теләгәндәрҙә ышаныс тойғоһо уятырға теләйем. Алғы һыҙыҡтағы егеттәргә беҙҙең иғтибар һәм йылы мөнәсәбәттең шул тиклем мөһим булыуын яҡшы аңланым. Хушлашыуы һис тә ҡыйын булманы, киреһенсә, бер аҙ тынысландым, был осрашыу барыһынан да ҡиммәт минең өсөн. Бындай көслө ярҙам, ҡайнар мөхәббәт менән яуҙа еңеүгә ышаныс та ҙур! Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондары аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото:шәхси архивтан.