Космостан Рәсәй Конституцияһы көнө менән ҡотланылар

2023 йылдың 12 декабрендә Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһы ректоры Данияр Мәүлиәр улы Абдрахманов һәм студенттар VII Бөтә Рәсәй хоҡуҡи (юридик) диктантының көндөҙгө этабында ҡатнашты. Был диктант 2023 йылдың 2 декабренән 12 декабренә тиклем халыҡтың хоҡуҡи грамоталылыҡ кимәлен баһалау маҡсатында үткәрелә, юридик диктантты ойоштороусы булып Рәсәй Юристар ассоциацияһы сығыш яһай. Рәсәй Федерацияһы Конституцияһы көнө менән ҡотлап, Рәсәй дәүләт китапханаһының Румянцев залынан юридик диктант яҙған бөтә юристар Һәм студенттар исеменә телекүпер аша Рәсәй Юристар ассоциацияһы рәйестәше, Рәсәй Федерацияһы Дәүләт Думаһының Дәүләт төҙөлөшө Һәм ҡануниәт буйынса комитеты рәйесе Павел Владимирович Крашенинников, Рәсәй Федерацияһы Дәүләт Думаһының Дәүләт төҙөлөшө һәм ҡануниәт буйынса комитеты рәйесе урынбаҫары, Рәсәй Юристар ассоциацияһының Башҡортостан бүлексәһе рәйесе Ирина Александровна Панькина, Рәсәй Федерацияһы Дәүләт Думаһының Мәҙәниәт буйынса комитеты рәйесенең беренсе урынбаҫары Дмитрий Анатольевич Певцов һәм башҡалар сығыш яһаны. Бөгөнгә ҡарата 64 илдән 1 миллиондан ашыу кеше диктант яҙған. Павел Крашенинников быйыл Рәсәй Федерацияһы Конституцияһы тураһындағы һорауҙарға дөрөҫ яуаптарҙың юғары проценты күҙәтелеүен билдәләне (74 %). Ә диктантта ҡатнашыусылар өсөн иң ауыр һорауҙар – гражданлыҡ хоҡуғы буйынса һорауҙар. Уларға дөрөҫ яуаптар - ни бары 32 процент. Шулай уҡ процессуаль хоҡуҡ мәсьәләләре менән дә ҡатмарлыҡтар тыуа. "Был - илебеҙҙә һигеҙенсе конституция, әммә ул совет конституцияларында булмаған берҙән-бер һәм беренсе туранан-тура ғәмәлдә булған закон. Илебеҙҙең төп законын ҡабул итеү йәмғиәт туплана башлағас, иҡтисад, дәүләт һәм хоҡуҡи институттар төҙөлә башлағас, иҫәп нөктәһе булып тора. Был бик мөһим, һәм был хаҡта һәр ваҡыт иҫтә тоторға тейеш", – тине Павел Крашенинников. - Конституция, беренсе сиратта, хәҙерге Рәсәй йәмғиәтенең база ҡиммәттәре буйынса йәмәғәт килешеүе акты булып тора, унһыҙ көслө дәүләт булдырыу мөмкин түгел. Тормош, лайыҡлылыҡ, кеше хоҡуҡтары, гуманизм, патриотизм, Ватанды һаҡлау, традицияларҙың күсәгилешлеге, тарихи хәтер кеүек ҡиммәттәр йәмғиәтебеҙ өсөн айырыуса ҡәҙерле. Конституцияның юбилейы, шулай уҡ беҙгә мәғрифәтселек сараларының мөһимлеге тураһында иҫкәртә һәм һеҙҙең менән осрашыуыбыҙ быға сағыу дәлил булып тора. Рәсәй Юристар ассоциацияһына йәмғиәтебеҙҙең хоҡуҡи мәҙәниәтен күтәреүгә индергән өлөшө өсөн рәхмәт белдерәм. Башҡортостан төбәк бүлексәһе рәйесе булараҡ, был хаҡта ишетеп кенә белмәйем, - тине Ирина Панькина. Бөтә Рәсәй хоҡуҡи диктантында ҡатнашыусыларҙы Халыҡ-ара космос станцияһы бортынан сәләмләнеләр. Рәсәй Геройы, МКС-70 һәм МКС-71 экспедициялары командиры Олег Кононенко, Роскосмостың космонавт-һынаусыһы Николай Чуб һәм космонавт Константин Борисов VII Бөтә Рәсәй хоҡуҡи диктантында ҡатнашыусыларҙы Халыҡ-ара космос станцияһы бортынан сәләмләп, граждандарҙы Рәсәй Конституцияһының 30 йыллығы менән ҡотланы. Башҡортостан Республикаһы исеменән Рәсәй Федерацияһы Конституцияһы көнө менән Башҡортостан Республикаһының Юстиция эштәре буйынса дәүләт комитеты рәйесе, Рәсәй Юристар ассоциацияһының Башҡортостан бүлексәһе советы ағзаһы Владимир Иванович Спеле сарала ҡатнашыусыларға уңыш һәм именлек теләне. Башҡортостан һәр ваҡыт Бөтә Рәсәй акцияһында әүҙем ҡатнаша, уға әүҙем гражданлыҡ позицияһы булған юғары уҡыу йорттары һәм республика халҡы ҡушыла, тип билдәләне ул. Башҡортостан дәүләт хеҙмәте һәм идара итеү академияһынан тыш, телекүпер аша онлайн диктант яҙыуҙа И.И. Ульянов исемендәге Ульяновск дәүләт педагогия университеты, Рәсәй дәүләт хоҡуҡ университетының Төньяҡ Кавказ филиалы студенттары ҡатнашты. Телекүпер барышында иғлан ителгәнсә, бер миллиондан ашыу студент билдәләнгән ваҡытта юридик диктант яҙған һәм ҡатнашыусылар араһында Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһы студенттары барлығын белеү ҡыуаныслы. – Юридик диктант ярҙамында беҙ әҙерлек кимәлен баһалай һәм ниндәй өлкәләрҙә тағы ла тырышып эшләргә кәрәклеген күрә алдыҡ. Диктантты ойоштороу һәм үткәреү юғары кимәлдә булды, ә унда ҡатнашыу - беҙҙең өсөн ҙур тәжрибә һәм оҫталығыбыҙҙы раҫлау. Бындай саралар артабан да үткәрелер тип ышанабыҙ, сөнки улар беҙгә үҙебеҙгә ышаныслыраҡ һәм компетентлыраҡ булырға ярҙам итә, – тип тәьҫораттары менән уртаҡлашты юридик факультет студенты Радмила Ғүмәрова. Иҫегеҙгә төшөрәбеҙ, бөгөн, 2023 йылдың 12 декабрендә, илдең Төп Законы – Рәсәй Федерацияһының Конституцияһы ҡабул ителеүҙең 30 йыллығын билдәләйбеҙ. Конституция – ул Бөтә Рәсәй хоҡуҡи системаһының нигеҙе. Ул юғары юридик көскә эйә, уларҙың мәғәнәһен һәм йөкмәткеһен билдәләй. Фото сығанағы: bagsurb.ru