Билдәле журналист Рафиҡ Әхмәтшин көмөш туйы көнөндә тыуған илде һаҡларға юлланды

Ир яҙмышы – ил яҙмышы, тип әйткән халҡыбыҙ. Тормошта был һүҙҙәрҙең хаҡлы булыуын Башҡортостан юлдаш телевидениеһының махсус хәбәрсеһе Рафиҡ Әхмәтшин да үҙ өлгөһөндә күрһәтте – Рәсәйҙең Оборона министрлығы менән контракт төҙөп, махсус хәрби операцияға юлланды. Рафиҡ Үзбәк улы хәрби хәбәрсе булараҡ, күп тапҡыр Донбасста булып ҡайтты, илебеҙгә ҡушылған төбәктәрҙең тормошон яҡтыртты, данлыҡлы генерал Шайморатов исемен мәңгеләштереүгә күп өлөш индерҙе. – Егет кешенең һүҙе менән эштәре тап килергә тейеш. Шуның өсөн дә 2020 йылдан бирле Донбасс юлын тапайым һәм әлеге ваҡытта үҙемде махсус хәрби операция биләмәһендә кәрәкле кеше итеп тойҙом, тоям. Илемә, республикама һәм халҡыма файҙам тейер, тип уйлайым. Шуның өсөн дә махсус хәрби операция биләмәһенә юлланам, - тип белдерҙе Рафиҡ Үзбәк улы. Рафиҡ Әхмәтшинды ғаиләһе, Белорет районынан килгән туғандары, яҡташтары, хеҙмәттәштәре оҙатып, иҫән-һау йөрөп ҡайтыуын теләне. – Хеҙмәттәшебеҙ, "Яңылыҡтар" хеҙмәтенең махсус хәбәрсеһе Рафиҡ Әхмәтшин махсус хәрби операцияға юлланырға хәл итте. Ышаныслы, абруйлы коллега, өлгөлө ғаилә башлығы, хәстәрлекле атай ул Рафиҡ Үзбәк улы. Иҫән-һау әйләнеп ҡайт, журналист ҡәләмең һымаҡ яугир ҡоралың да үткер булһын! – тине хеҙмәттәше, “Яңылыҡтар” хеҙмәтенең махсус хәбәрсеһе, Дәүләт Йыйылышы – Ҡоролтай депутаты Рәмзиә Кәримова. Рафиҡ Әхмәтшиндың ҡатыны, "Юлдаш" радиоһы хеҙмәткәре Зөһрә Арсаеваға һәм балаларына айырыуса ауыр ине. - Бөгөн беҙҙең Рафиҡ менән туйыбыҙға 25 йыл тулды. Был көндө уны махсус хәрби операцияға оҙатыуы бигерәк ҡыйын, - тине ул. Хеҙмәттәшебеҙгә һәм барлыҡ ил һаҡсыларына иҫән-һау әйләнеп ҡайтыуҙарын теләйбеҙ. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондары аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ.Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Рәмилә Мусина фотолары. Фото: vk.com/ramzia.karimova