Был йүнәлештә алға табан барабыҙ

11 декабрҙә аҙна һайын уҙғарылған оператив кәңәшмәлә республикала ЮНЕСКО проекттарын һәм программаларын тикшерҙеләр. Башҡортостандағы ЮНЕСКО эштәре буйынса комитеттың башҡарма директоры Элина Ғатауллина 2023 йылдың ноябрендә республика ойошмаһының үҙенең 25 йыллығын билдәләүе хаҡында һөйләне һәм төбәк етәксеһенә Рәсәйҙең сит ил эштәре министры, ЮНЕСКО эштәре буйынса Рәсәй Федерацияһы Комиссияһы рәйесе Сергей Лавровтың сәләмләү хатын тапшырҙы. – Башҡортостан ЮНЕСКО линияһы буйынса мәҙәни, ғилми һәм белем биреү башланғыстарын алға һөрөү буйынса Рәсәйҙең өс лидеры иҫәбенә инә, – тип билдәләне Элина Ғатауллина. – Нимә менән йәшәүебеҙ, нимә менән ғорурланыуыбыҙ һәм ниндәй ҡиммәттәрҙе яҡлауыбыҙ тураһында ышаныслы мәғлүмәтте мөмкин тиклем киң аудиторияға еткереү мөһим тип иҫәпләйбеҙ. Мәҫәлән, илдең сит илдәрҙәге гуманитар сәйәсәт концепцияһына ярашлы ЮНЕСКО-ның ассоциацияланған мәктәптәре уҡыусылары өсөн саралар үткәрелә. Балалар конкурстарҙа, форумдарҙа һәм уҡытыу лекцияларында әүҙем ҡатнаша. Атап әйткәндә, конкурс еңеүселәре – Туймазы уҡыусылары – Арктикала булып ҡайтты, ә Өфөнөң 71-се мәктәбе уҡыусылары Ҡытайҙа булды. Комитет шулай уҡ ЮНЕСКО кафедраларын булдырыу һәм үҫтереү буйынса республиканың алдынғы юғары уҡыу йорттары менән эш алып бара. Элина Ғатауллина тәбиғи мираҫты һаҡлауҙа һәм популярлаштырыуҙа Башҡортостандың геопарктары мөһим роль уйнауын һыҙыҡ өҫтөнә алды. “Торатау” геопаркы ЮНЕСКО статусын алыу өҫтөндә әүҙем эш бара. Бынан тыш, ЮНЕСКО-ның глобаль геопарктар селтәренә ингән “Янғанта” геопаркы тәүге тапҡыр статусты раҫлау процедураһын үтте. Яҡын арала халыҡ-ара тикшереү һөҙөмтәләре билдәле буласаҡ. Дуҫ дәүләткә тәүге геопарк булдырыу буйынса консультация ярҙамы йәһәтенән Белоруссия менән үҙ-ара ғилми эш киңәйә. Республикала “Башҡорт Уралы” ЮНЕСКО биосфера резерваты биләмәһендә Бөрйән солоҡ ҡорто генофондын һаҡлауға айырым иғтибар бүленә. Комитеттың 2024 йылға планында – Белорет районында яңы геопарк булдырыу, өс телдә “Урал батыр” башҡорт халыҡ эпосын нәшер итеү, Африка илдәре ҡатнашлығында Туған телдәр фестивален һәм Геопарктар һәм биосфера резерваттары буйынса халыҡ-ара конференцияһын уҙғарыу. Республика етәксеһе Башҡортостанда ЮНЕСКО эштәре буйынса комитет коллективына башҡарған эштәре өсөн рәхмәт әйтте, шулай уҡ төбәктең Эшҡыуарлыҡ һәм туризм министрлығына Тәбиғәттән файҙаланыу һәм экология министрлығы менән берлектә Белорет районында геопарк булдырыу мәсьәләһен тикшерергә ҡушты. – Яҡшы эшегеҙ өсөн ҙур рәхмәт. Республика ғорурланырлыҡ, ә иң мөһиме – үрләйһе үрҙәр бар. Һеҙҙең тәҡдимдәрегеҙҙе ихлас хуплаясаҡбыҙ, – тине Радий Хәбиров. – Һис шикһеҙ, эште дауам итергә кәрәк, “Торатау” геопаркының да ЮНЕСКО статусын алыуы мөһим. Ә беҙҙең “Янғантау” артабан үҫешеү өсөн сираттағы дәлил алды. Был барыбыҙҙы ла дөрөҫ эшләүебеҙ тураһында һөйләй. Алға барабыҙ. Фото: Башҡортостан Башлығы сайты.