"Красноусол" шифаханаһы үҫешә

11 декабрҙә Башҡортостан Башлығы Радий Хәбиров уҙғарған аҙналыҡ оператив кәңәшмәлә Ғафури районындағы “Красноусол” шифаханаһын үҫтереү мөмкинлектәре тикшерелде. Учреждениеның генераль директоры Рәмил Бәҙретдинов йыл әйләнәһенә эшләгән “Красноусол” курорты 559 урынға иҫәпләнгәнен һөйләне. Уның махсуслашыуы – тире, аш һеңдереү һәм тын алыу ағзалары, һөйәк-мускул, репродуктив һәм нервы системалары сирҙәре менән яфаланған пациенттарҙы һауыҡтырыу. 2023 йыл башынан алып шифаханаға 20 меңдән ашыу кеше килгән, ул Башҡортостанда һәм Рәсәйҙең башҡа төбәктәрендә, шулай уҡ Ҡаҙағстанда йәшәүселәр араһында популярлыҡ менән файҙалана. “Красноусол”дың тәьмин ителеше 2021 йылда 68 проценттан 2023 йылда 105 процентҡа тиклем артты. Шифахана тотороҡло үҫешә һәм быны финанс-иҡтисади күрһәткестәрҙә сағылдыра. 2022 йылдан төп капиталға инвестициялар 300 миллион һумдан ашыу тәшкил иткән, аҡса медицина ҡорамалдарын һатып алыуға, объекттар төҙөүгә һәм реконструкциялауға йүнәлтелгән. Мәҫәлән, 2022-2023 йылдарҙа бында дауалау-диагностика һәм спорт-сәләмәтләндереү комплекстары асылған, туҡланыу комплексына сертификация үткәрелгән, тар белгеслектәге табиптар штаты киңәйтелгән, өҫтәмә рәүештә 22 төр диагностика һәм физиотерапия хеҙмәтләндереүҙәре индерелгән, ашханаға капиталь ремонт яһалған. Шифахана етәксеһе Рәмил Бәҙретдинов билдәләүенсә, урология һәм колопроктология бүлеген, бишенсе һәм алтынсы корпустар араһында 120 урынлыҡ кафе-ашхананы, 1,5 километр оҙонлоҡтағы саңғы-роллер трассаһын төҙөү дауам итә. Шулай уҡ учреждениены үҫтереү стратегик программаһы сиктәрендә 2025 йылға тиклем ҡаҙанлыҡты, биологик таҙартыу ҡоролмалары һәм канализация коллекторы биналарын капиталь ремонтлауға тотонорға планлаштырыла. Ер аҫты эсәр һәм техник һыуҙар сығарыу өсөн ер аҫты байлыҡтарын файҙаланыуға лицензия алыуға документтар әҙерләнгән. – Был конкуренцияға һәләтлелекте һәм күрһәтелгән һауыҡтырыу хеҙмәттәренең сифатын күтәрергә мөмкинлек бирәсәк, – тине Рәмил Бәҙретдинов. Башҡортостан Башлығы “Красноусол” шифаханаһы етәксеһенә учреждениеның эш һөҙөмтәлелеге өсөн рәхмәт белдерҙе. – Иҫ киткес үҙгәрештәр. Бөтә финанс күрһәткестәре үҫә, килем өлөшө лә күбәйгән, 100 процент тулыуҙы күрһәтәһегеҙ. Артабан да шулай дауам итегеҙ. Яңы проекттарҙы тормошҡа ашырыуҙа уңыштар теләйем, – тип йомғаҡ яһаны Радий Хәбиров. Фото: Башҡортостан Башлығы сайты.