Быйыл май айында Саҡмағош ауылында Кейеҙ үҙәге асылған. Райондың тарих-тыуған яҡты өйрәнеү музейында урынлашҡан үҙәк Балалар сәнғәт мәктәбе ҡарамағында эшләй. Ҡыҫҡа ғына ваҡыт эсендә бында шөғөлләнгән ҡыҙҙар һәм егеттәр үҙҙәрен кейеҙ баҫыу оҫтаһы итеп танытып өлгөргән. Барыһы ла үҙәк етәксеһе Нәфисә Ғилметдинованың кейеҙ сәнғәтенә һөйөүенән башлана. Был ҡыҙыҡһыныу Өфө районының Балалар ижады үҙәгендә эшләгәнендә барлыҡҡа килә. Нәфисә Рәбис ҡыҙы осраҡлы рәүештә кейеҙ сәнғәтен тергеҙгән оҫталар Кәримә Кайдалова менән Тәлғәт Мәсәлимов ойошторған семинарға эләгә. Тәлғәт Хәсән улы Башҡорт дәүләт педагогия университетының художество-графика факультетында уҡығанында ғилми етәксеһе лә була. Балалар ижады үҙәгендә кейеҙ түңәрәге асып, төрлө әйберҙәр ижад итә башлағас, остазы Башҡорт дәүләт педагогия университетында ҙур күргәҙмә ойошторорға, Нәфисә Ғилметдинованың һәм уның етәкселегендәге балаларҙың эштәрен киңерәк танытыуға ярҙам итә. Ике йыл элек Саҡмағошҡа күсеп ҡайтып, урындағы Балалар сәнғәт мәктәбендә эшләй башлағас та яратҡан шөғөлөн ҡалдырмай Нәфисә Рәбис ҡыҙы. Уҡыусылар ҙа яйлап был ят шөғөлгә ылыға, ҡыҙыҡһына башлай, ә педагог үҙе Саҡмағошта кейеҙ үҙәге асыу идеяһы менән яна. Уның тәҡдимен мәктәп директоры Гөлзиә Сабир ҡыҙы Ситдиҡова ла хуплай. Шулай итеп, май айында яңы үҙәк тантаналы шарттарҙа асыла. Бында ҡыҙҙар ғына түгел, малайҙар ҙа ҙур теләк менән йөрөй. Улар кейеҙҙән милли биҙәкле паннолар, сувенирҙар, келәмдәр эшләргә өйрәнә. Балаларҙың иҫ киткес ҙур мауығыу менән шөғөлләнгәнен һәм ижад иткән әйберҙәренең матур, үҙенсәлекле булыуын күреп, Саҡмағош районы хакимиәте башлығы Реканс Йәмәлиев шәхсән ярҙам күрһәтергә ҡарар итә һәм үҙәккә заманса ҡорамалдар, махсус машиналар һатып алып бирә. Бындай мөмкинлектәр тыуҙырылғас, балаларҙың ҡыҙыҡһыныуы тағы ла арта. Бөгөн уларҙың ижад емештәре районда һәм төбәктә үткән төрлө күргәҙмәләрҙең йәменә әйләнгән. Ап-аҡ кейеҙҙән башҡорт орнаменты менән биҙәп эшләнгән тирмә макеттары, келәм рәүешендәге Башҡортостан картаһы, легендаларға нигеҙләнеп эшләнгән картиналар, уңдырышлы Саҡмағош еренең символы булған әпәкәй, бәлеш һәм сәк-сәк кеүек сувенирҙар барыһы ла һоҡланыу уята. Тырыш, һәләтле балаларға һәм уларҙың егәрле етәксеһе Нәфисә Ғилметдиноваға артабан да уңыштар теләйбеҙ. Айрат Нурмөхәмәтов фотолары.