Дүртөйлө үҙәк район дауаханаһы, ”Һаулыҡ һаҡлау” милли проектының беренсел звеноны яңыртыу программаһына ярашлы, наркоз-тын алыу аппараты алды. Яңы аппарат төрлө ағзаларҙа әмәлиәттәр үткәргәндә дөйөм анестезияны тәьмин итә. Техника үпкәне елләтеү һәм пациенттың йәшәү эшмәкәрлеген күҙәтеү өсөн тәғәйенләнгән. Наркоз биргәндә аппарат ҡатнашманы организмға тейешле миҡдарҙа, кәрәкле температурала һәм дымлылыҡта илтә, шулай уҡ углекислы газды сығара. ”Әлеге ваҡытта ҡорамал файҙаланыуға тапшырылған. Ул төрлө йәштәге пациенттар өсөн көндәлек анестезиология практикаһында ҡулланыла. Яңы юғары технологияның пациенттарға операция үткәреү ваҡытында сифатлы медицина ярҙамы күрһәтәсәгенә ышанам”, – тине дауахананың анестезиология-реаниматология бүлексәһе мөдире Марат Шәрәфетдинов. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение") төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновациялы медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың беренсел звеноһын яңыртыу программаһының маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.