Йөрәге ҡушыуы буйынса

Заман башҡа, заң башҡа, тиһәләр ҙә, бер ҡасан да үҙҡиммәтен юғалтмаған мәңгелек төшөнсәләр бар. Шундайҙарҙың береһе – Тыуған илде һаҡлау. Ниндәй генә осорҙо алмайыҡ, халҡыбыҙ ғәзиз тыуған ерен һаҡларға, яҡларға ынтылған. Бөгөн дә яугирҙәребеҙ махсус хәрби операцияла ҡатнаша. - Илебеҙ тыныслығын, балаларыбыҙҙың киләсәген һаҡлау – һәр ир-егеттең изге бурысы,- ти махсус хәрби операцияла ҡатнашыусы, позывнойы “Ярмух” булған яҡташыбыҙ. Ул – сығышы менән Ҡырмыҫҡалы ауылынан. Махсус хәрби операция зонаһына китер алдынан Ҡырмыҫҡалы ауылының 81-се янғын һүндереү часында эшләй. Өйләнгән, ҡатыны менән ике малай үҫтерәләр. “Ярмух” быйыл июндә илебеҙҙең Оборона министрлығы менән хәрби контракт төҙөй. Яугир арҙаҡлы Таһир Күсимов исемендәге мотоуҡсылар батальонына эләгә. Унда дүрт ай була һәм хәрби әҙерлек үтә. Артабан ул Даян Мурзин исемендәге батальонға күсерелә. - Минең махсус хәрби операция зонаһында тыныслыҡ, нацизмға ҡаршы көрәшкән яҡташтарыбыҙ араһында булыу теләгем ҡаты һәм аныҡ ине. Еребеҙҙе нацизмдан яҡлар өсөн йөрәк ҡушыуы буйынса киттем, - ти “Ярмух”.- Күрше Арханел районы егеттәре менән бергә хеҙмәт итәбеҙ. Яугирҙәр араһында хәрби дуҫлыҡ көслө, алғы һыҙыҡта бер-беребеҙгә ышаныслы ҡалҡанбыҙ. “Ярмух”ты өйҙә яратҡан ҡатыны һәм балалары көтә. - Ул ошондай еңел булмаған ҡарар ҡабул итте һәм, хәрби контрактҡа ҡул ҡуйып, доброволец булып китте. Белеп ҡалғас, кире уйлатырға тырышып ҡараныҡ, тик булманы, үҙ һүҙендә ныҡ торҙо һәм беҙ риза булып, уның ҡарарын хупланыҡ, - ти ҡатыны. Махсус хәрби операцияла хеҙмәт итеүсе “Ярмух” ҡушаматлы яугиребеҙ хәрби бурысын намыҫты үтәгәне өсөн Башҡортостан Башлығы Радий Хәбиров ҡулынан исемле бысаҡ алды. Бынан тыш, миҙал менән бүләкләнә. - Яҡташтарыбыҙға ҙур рәхмәт, Башҡортостан Башлығы Радий Фәрит улы Хәбировҡа беҙҙе онотмағаны һәм беҙгә ҙур ярҙам күрһәткәне өсөн айырым рәхмәтебеҙҙе белдерәбеҙ,- ти хәрби хеҙмәткәр. Халыҡ ҙур теләк менән яҡташтарына ярҙам ҡулы һуҙа. - Бик күп посылкалар алып торабыҙ. Күптән түгел Ҡырмыҫҡалылағы С.М. Чугункин исемендәге мәктәптең 2-се “а” класс уҡыусыларынан посылка алдыҡ. Унда уҡыусылар яҙған хаттар ҙа бар ине. Уларға ҙур рәхмәт, тырышып уҡыһындар тип әйткем килә,- ти ул. Әле “Ярмух” ҡыҫҡа ваҡытлы ялға ҡайтҡан. Әйткәндәй, уның бер туған ҡустыһы махсус хәрби операция башланыу менән мобилизациялана. Уны ла яҡындары түҙемһеҙләнеп көтә. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондара аша, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото: .com/public29350652