Рәсәй Конституцияһы буйынса белемегеҙҙе тикшерә алаһығыҙ

12 декабрҙә VII Бөтә Рәсәй хоҡуҡи (юридик) диктантының йомғаҡлау саралары үтәсәк. Мәғариф акцияһының төп этабына Рәсәйҙең бөтә төбәктәре лә ҡушыласаҡ. Башҡортостанда өс майҙансыҡ эшләйәсәк: Башҡортостан дәүләт хеҙмәте һәм идара итеү академияһында, Өфө фән һәм технологиялар университетының Хоҡуҡ институтында, Рәсәй Федерацияһы Хөкүмәте ҡарамағындағы Финанс университетының Өфө филиалында. Мәскәүҙә Рәсәй дәүләт китапханаһы сараның үҙәк майҙансығы буласаҡ. Ғәҙәттәгесә, сәләмләү мөрәжәғәттәре менән күренекле дәүләт эшмәкәрҙәре сығыш яһаясаҡ. – Быйыл илебеҙ бик мөһим һәм әһәмиәтле датаны – Рәсәй Федерацияһы Конституцияһының 30 йыллығын билдәләй һәм, әлбиттә, мәсьәләләрҙең бер өлөшө илдең төп документына арналасаҡ. Республикабыҙҙың ғәҙәттәгесә иң әүҙем ҡатнашҡан төбәктәр иҫәбендә булыуы һәм яҡшы һөҙөмтәләр күрһәтеүе ҡыуаныслы. Диктант йомғаҡтарын һәр ваҡыт анализлайбыҙ һәм профессиональ юристарҙың мәғрифәтселек эшен ҡайҙа һәм ниндәй өлкәләрҙә камиллаштырырға, ғәмәлдәге хоҡуҡ нормаларын киң йәмәғәтселеккә әүҙемерәк еткерергә тейешлеген аңлайбыҙ, – тип билдәләне Дәүләт Думаһының Дәүләт төҙөлөшө һәм ҡануниәт буйынса комитеты рәйесенең беренсе урынбаҫары, Рәсәй Юристар ассоциацияһының Башҡортостан бүлексәһе рәйесе Ирина Панькина. Белемегеҙҙе хәҙер үк юрдиктант.рф сайтында онлайн тикшерергә мөмкин. Бөтә Рәсәй хоҡуҡи (юридик) диктанты 14 йәштән өлкән граждандарға иҫәпләнгән. Тест 40 һорауҙан тора, яуаптарға 60 минут бирелә. Ике ҡатмарлылыҡ кимәле ҡаралған: “База” һәм “Профессиональ”. Ойоштороусы алты телдә (рус, ҡытай, инглиз, ғәрәп, испан һәм португал) диктант яҙыу мөмкинлеген күҙ уңында тота. Бынан тыш, юридик диктантҡа билдәле юристарҙан, дәүләт һәм йәмәғәт эшмәкәрҙәренән видеоһорауҙар индереләсәк. Тест тамамланғас, һәр ҡатнашыусы юридик диктантты үтеү тураһында сертификатты шәхси һөҙөмтә менән күсереп алыу мөмкинлегенә эйә. 2023 йылдың 13 декабрендә рәсми платформала дөрөҫ яуаптар менән мәғлүмәт материалдары урынлаштырыла. Билдәләп үтергә кәрәк, уҙған йылдарҙа диктант Рәсәйҙең хоҡуҡи мәғариф өлкәһендәге иң билдәле һәм ҙур проекттарының береһенә әүерелде. 2017 йылдан Рәсәй ҡануниәте тураһында һорауҙарға 175 илдән өс миллионға яҡын ҡатнашыусы яуап биргән. Былтыр Рәсәйҙә һәм сит илдәрҙә йәшәгән бер миллиондан ашыу кеше диктант яҙған. Диктантты Рәсәй Федерацияһының бөтә төбәктәрендә лә, шул иҫәптән Донецк Халыҡ Республикаһы, Луганск Халыҡ Республикаһы, Херсон һәм Запорожье өлкәләрендә яҙғандар. Диктантта ҡатнашыусы иң әүҙем төбәктәр – Башҡортостан Республикаһы, Ульяновск өлкәһе, Краснодар крайы һәм Пермь крайы. Фото сығанағы: Рәсәй Юристар ассоциацияһы.