Өфөлә Башҡортостанда Эшҡыуарҙарҙың хоҡуҡтарын яҡлау буйынса вәкил һәм Эшҡыуарлыҡ ойошмалары ассоциацияһы менән берлектә “Клининг хеҙмәттәре баҙарында ҡатнашыусылар эшмәкәрлегенең үтә күренмәлелеген күтәреү” темаһына түңәрәк өҫтәл үтте. Республиканың клининг хеҙмәттәре операторҙарына клининг баҙары һәм техник эксплуатациялауҙың үтә күренмәлелеген арттырыу буйынса тармаҡ проектында ҡатнашырға тәҡдим ителде. Клининг хеҙмәттәренән файҙаланыусы предприятие һәм ойошмаларға “Инфоресурс ФМ” мәғлүмәт сервисынан әүҙемерәк файҙаланырға тәҡдим ителде. Был ресурс тармаҡты асығыраҡ итеү, проектҡа булышлыҡ күрһәтеү өсөн булдырылған. “Ул намыҫлы конкуренция өсөн көрәштә баҙарҙа ҡатнашыусыларҙы көйләү өсөн ҙур потенциалға эйә”,–тип билдәләне Башҡортостанда Эшҡыуарҙар хоҡуҡтарын яҡлау буйынса вәкил Ирина Абрамова. “Бәләкәй күләмдәге һатыу агрегаторы” мәғлүмәт системаһында әлегә теркәлмәгән эшҡыуарҙарға һатып алыуҙарҙа ҡатнашыу өсөн теркәлергә тәҡдим ителде. “Был ресурс бәләкәй бизнесҡа дәүләт һәм муниципаль заказдарҙың өҫтәмә күләмен алыуҙан тыш, ыңғай репутацияға эйә булырға ярҙам итәсәк. Әлегә был системаға теркәлмәгәндәр сервисҡа бизнес өсөн потенциаль үҫеш нөктәһе итеп ҡараһын ине", –тип белдерҙе Конкурентлы сәйәсәт буйынса дәүләт комитеты рәйесе Гөлшат Арыҫланова. Уның һүҙҙәренә ҡарағанда, быйыл 11 ай эсендә республиканың дәүләт һәм муниципаль заказсылары тарафынан 852,3 миллион һумға 8194 контракт төҙөлгән. Ирина Абрамова түңәрәк өҫтәлдә ҡатнашыусыларға ҡыҙыҡлы һәм конструктив тәҡдимдәре өсөн рәхмәт белдерҙе. Фото: https://pravitelstvorb.ru/news/22497/