Ошо көндәрҙә “Гильза” позывнойлы яҡташым менән осрашырға яҙҙы. Ул махсус хәрби операция биләмәһенән яраланып ҡайтып, дауаланып йөрөй икән. "Гильза" махсус хәрби операция башланыу менән Оборона министрлығы менән контракт төҙөргә уйлай. Шулай ҙа эшендәге мәшәҡәттәр арҡаһында был ниәтен бер аҙ кисектереп, былтыр октябрь айында хәрби әҙерлек үҙәгенә юллана. 44 йәшлек ир-егеттең хәрби тәжрибәһе арыу ғына: Чечнялағы ҡораллы бәрелештәрҙә сыныҡҡан, тыныс тормошта бер нисә йыл эске эштәр бүлегендә патруль-пост хеҙмәтендә эшләп алған. Әле яугиргә снаряд ярсығы эләгеп, уң аяғы яраланған. Мәскәүҙә операция эшләгәндәр. Һамар ҡалаһындағы госпиталгә барып күренеп тора. “Яраланһам да, хәрби контрактым дауам итә. Комиссия ҡарап, хеҙмәткә яраҡлы тиеү менән, тағы махсус операция биләмәһенә юлланырға уйлайым”, - ти Гильза. “Бер йыл самаһы булғанһың, етмәһә, ауыр ғына яраланғанһың, барыбер кире барам тиһең. Был теләк нимәгә бәйле?” – тип һорайым яугирҙән. “Унда иптәштәрем ҡалды. Улар менән бәйләнештәмен, мине көтәләр. Минең аяҡты яралаған снарядтың икенсе ярсығынан яуҙаш дуҫым – күрше ауыл егете һәләк булды. Уның өсөн дә үс алырға тейешмен. Еңеүҙең беҙҙең яҡта булырына шикләнмәйем”, - тип яуапланы "Гильза". Яусыл, сәмсел ир-егеткә тиҙерәк һауығыуын, ошо рух ныҡлығын юғалтмауын теләп хушлаштым. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондара аша, “Минең документтарым” күп функциялы үҙәгенең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Фото: Гильзаның шәхси альбомынан.