Уның бурысы булмаһа ла...

Бөгөн, 7 декабрҙә, Өфөлә медицина взводы командиры, мотоуҡсылар батальоны табибы Михаил Каменев менән бәхилләшеү сараһы үтте. Унда Башҡортостан Башлығы Радий Хәбиров ҡатнашты. Хушлашыу Ҡыуатов исемендәге республика клиник дауаханаһында уҙҙы, унда яугир һәм герой 2002 йылдан торакаль хирургия бүлексәһенең табип-торакаль хирургы вазифаһында эшләгән. Был турала “Башинформ” мәғлүмәт агентлығы хәбәр итә. “Хөрмәтле Любовь Климовна, Владимир Владимирович, Анна Александровна. Михаил Владимировичтың туғандары, яҡындары һәм коллегалары. Хөрмәтле иптәштәр! Бөгөн беҙ ауыр йөрәк менән ошонда йыйылдыҡ. Улығыҙ һәм тормош иптәшегеҙ оҙаҡ ваҡыт МХО биләмәһендә табип-ирекмән булды. Мин һәр саҡ Донецк һәм Луганск халыҡ республикаларында йәшәгән кешеләрҙән хөрмәт һүҙҙәрен ишеттем. Михаил бик ҡыйыу кеше, уның автомобилдән сығып китеү мөмкинлеге була, әммә хәрби иптәштәре менән ҡала һәм һәләк була. Геройҙың ғаиләһе беҙҙең яҡлау аҫтында буласаҡ һәм мотлаҡ рәүештә балаларҙы күтәрергә ярҙам итәсәкбеҙ. Хөрмәтле ата-әсәләр, һеҙ бик яҡшы балалар тәрбиәләгәнһегеҙ. Ҡайғығыҙҙы уртаҡлашабыҙ һәм һәр саҡ янығыҙҙа булырбыҙ. Егеттәрҙе ерләүе бик ауыр, улар илебеҙ өсөн көрәшә, ысын геройҙар. Улар беҙҙең күңелдәрҙә ҡалһын өсөн хәтерҙәрен мәңгеләштерербеҙ”, – тине Радий Хәбиров. Республика етәксеһе геройҙың ата-әсәһенә Михаил Каменев ҡаһарманлығы һәм фиҙакәрлеге өсөн үлгәндән һуң бүләкләнгән генерал Шайморатов орденын тапшырҙы. “Ысын табиптар династияһынан Михаил. Медицина университетын тамамлағандан һуң 20 йылдан ашыу атаһы, Ҡыуатов исемендәге дауаханала күкрәк хирургияһы бүлеге мөдире Владимир Владимирович кеүек хирург булып эшләй. Унда шулай уҡ уның ҡустыһы Константин Владимирович эшләй. Ул ЛНР-ға үҙ теләге менән барған тәүге табиптарҙың береһе. 29 августа контракт буйынса хәрби хеҙмәткә инде. Медицина взводы командиры булып хеҙмәт итә, алғы һыҙыҡта һәр саҡ ярҙам күрһәтә һәм шунда уҡ, үҙенең хәрби иптәштәрен алып сығырға тырышып, һәләк була. Ул ысын герой, ысын табип булараҡ эш итә, аҙаҡҡаса үҙенең һөнәри һәм гражданлыҡ бурысына тоғро ҡала. Ошо ҡаһарманлығы өсөн үлгәндән һуң ул Батырлыҡ орденына лайыҡ була. Лайыҡлы ул үҫтергәнегеҙ өсөн рәхмәт, бар республика һеҙҙең менән бергә ҡайғыра. Хөрмәтле Анна Александровна, һеҙ Михаил Владимирович менән өс бала тәрбиәләгәнһегеҙ. Ғаиләгеҙҙе ҡалдырмаясаҡбыҙ, кәрәкле ярҙам күрһәтеләсәк. Ауыр тупрағы еңел булһын”, –тип билдәләне Башҡортостан Башлығы хакимиәте етәксеһе Максим Забелин. Республиканың хәрби комиссары Михаил Блажевич, ҡыҙғанысҡа ҡаршы, һуғыш яҡшыларҙы алып китә, тип билдәләне. “Геройыбыҙ күпме яугиргә медицина ярҙамы күрһәткәнен, күпме хәрби иптәшен үлемдән ҡотҡарғанын иҫәпләп сығарыуы ауыр. Михаил һәр саҡ алғы һыҙыҡта булған һәм алғы һыҙыҡта һәләк булған. Мәңгелек дан һәм мәңгелек хәтер”, – тине Михаил Блажевич. Хәрби комиссар Батырлыҡ орденын табиптың ата-әсәһенә тапшырҙы. Михаил Каменевтың туғандарына һәм яҡындарына ҡайғы уртаҡлашыу һүҙҙәре менән Өфө хакимиәте башлығы Ратмир Мәүлиев, БДМУ ректоры Валентин Павлов, Республика клиник дауаханаһы буйынса коллегалары мөрәжәғәт итте. Сара Рәсәй флагын геройҙың ҡатынына тапшырыу менән тамамланды. Михаил Владимирович Каменев, медицина взводы командиры, медицина хеҙмәте лейтенанты, 1975 йылдың 27 сентябрендә Өфөлә тыуған. 1992 йылда - 3-сө урта мәктәпте, 1997 йылда “педиатрия” белгеслеге буйынса Башҡорт дәүләт медицина университетын тамамлай. 2002 йылдан Ҡыуатов исемендәге республика клиник дауаханаһының торакаль хирургия бүлексәһендә табип-торакаль хирург булып эшләй. Өйләнгән, ҡатыны менән өс бала тәрбиәләгән. Быйыл март айынан май айына тиклем Башҡортостандан башҡа ирекмәндәр иҫәбендә Донецк Халыҡ Республикаһында ауырыуҙарҙы һәм яраланған яугирҙәрҙе дауалауҙа ярҙам күрһәтеүҙә ҡатнаша. 29 августа контракт буйынса хәрби хеҙмәткә инә, 30-сы гвардия айырым мотоуҡсылар бригадаһының медицина взводы командиры итеп тәғәйенләнә. Башҡортостан Республикаһының Почет грамотаһы һәм Һаулыҡ һаҡлау министрлығының Почет грамотаһы менән бүләкләнгән. Рәсәй Президенты Указы менән ҡаһарманлыҡ һәм фиҙакәрлек өсөн үлгәндән һуң Батырлыҡ ордены менән наградланған. Михаил 2023 йылдың 5 ноябрендә Донецк Халыҡ Республикаһының Авдеевка янында яралыларҙы эвакуациялауҙа махсус хәрби операция барышында алынған йәрәхәттәр һөҙөмтәһендә һәләк була. Медвзвод командиры бурысына яралыларҙы туранан-тура эвакуациялау инмәй, эвакуация ойоштороу һәм тәүге ярҙам күрһәтеү генә инә, ләкин уның үҙенә яралыларҙы алырға тура килә, сөнки санитарҙар һәм фельдшерҙар етмәй. Рейстарҙың береһендә уға “Баба Яга” дроны һөжүм иткән. Улар йәрәхәтләнгәндәрҙе, машинаны ташлап, сығып китә алған, ләкин быны эшләмәгәндәр, табиплыҡ һәм гражданлыҡ бурысына тоғро ҡалғандар. Улар дрон осоп етә алмаған урман янына барып етергә теләгән. Әммә өлгөрмәгәндәр һәм бөтәһе лә һәләк булған. Михаил Каменевтың исеме мәңгелеккә хәтерҙә ҡаласаҡ һәм табип-геройға мәңгелек дан. Фото һәм сығанаҡ: "Башинформ".