Борай районы башҡорттары ҡоролтайы рәйесе Илгиз Зөфәр улы Харисов – төбәктәге иң һөҙөмтәле эшләүсе йәмәғәтселәрҙең береһе. Илгиз Зөфәр улы 1964 йылдың 12 июнендә Борай районының Кәшкәләү ауылында тыуған. 1986 йылда Башҡорт дәүләт педагогия институтын тамамлаған. Йәш белгес хеҙмәт эшмәкәрлеген Ырымбур өлкәһе Орск ҡалаһының 17-се мәктәбендә һыҙма һәм һүрәт төшөрөү уҡытыусыһы булып башлаған. Совет Армияһы сафында хеҙмәт иткәндән һуң, 1988 йылда Илгиз Зөфәр улы тыуған районына ҡайта һәм Пионерҙар йорто етәксеһе булып эшләй башлай. 1995 йылда И. Харисовты Баҡалы тулы булмаған урта мәктәбенә директор һәм һынлы сәнғәт уҡытыусыһы итеп ебәрәләр. 2004 йылдан Илгиз Зөфәр улы Яңы Таҙлар урта дөйөм белем биреү мәктәбенә етәкселек итә. Ошо йылдар дауамында, ауыл мәктәбе директоры вазифаһы менән бер рәттән, ул һыҙма һәм һынлы сәнғәт уҡытыусыһы эшен дә алып бара. Тап ошо ваҡытта ул район рәссамдары әҫәрҙәренән торған картиналар галереяһын булдыра, мәктәптең данын тирә-яҡҡа тарата. 2010 йылдан Илгиз Зөфәр улына бөтөнләй икенсе эшмәкәрлек өлкәһендә эшләү мөмкинлеге сыға: уға район хакимиәтенең мәҙәниәт бүлегенә етәкселек итеү эшен ышанып тапшыралар. Илгиз Харисов тәүге көндән үк уның етәкселегендә эшләгән бөтә хеҙмәткәрҙәр менән уртаҡ тел таба, сөнки, инаныуынса, татыу, дуҫ хеҙмәти коллектив ҡына юғары һөҙөмтәләргә өлгәшә ала. 2012 йылдың октябренән И.З. Харисов Борай районы башҡорттары ҡоролтайы рәйесе итеп һайлана. 2020 йылда әүҙем эшмәкәрлеге өсөн Борай районы буйынса Башҡорт теле йылына арналған сараларҙы иң яҡшы ойоштороу конкурсында өсөнсө урын биләй. 2021 йылда иһә Бөтә донъя башҡорттары ҡоролтайы иғлан иткән Башҡорт тарихы йылы һөҙөмтәләре буйынса Борай районы I дәрәжә диплом менән бүләкләнә. Ошо 11 йыл эсендә Борай башҡорттары ҡоролтайы бик күп ҡыҙыҡлы саралар үткәргән, бер нисә ҙур проектты тормошҡа ашырған. Илгиз Зөфәр улы РФ Президентының мәҙәни башланғыстар фонды ярҙамында тормошҡа ашырылған биш проект авторы булып тора. 2023 йылда Борай районында III "Танып-Су" Бөтә Рәсәй этно-арт симпозиумы, Татарстандың һәм Башҡортостандың халыҡ артисы Хәмдүнә Тимерғәлиева иҫтәлегенә арналған "Ҡульяулығым төшөп ҡалды Борай болондарында" төбәк-ара халыҡ йырын башҡарыусылар конкурсы, "Етендән күлдәккә тиклем" белем биреү-уҡытыу проекты уңышлы үткән. 2024 йылда Өфө ҡалаһының 450 йыллығына арналған VIII "Йәйғор" Республика балалар-үҫмерҙәр ижады конкурсы, махсус хәрби операцияла һәләк булған герой Вадим Заһиров иҫтәлегенә арналған “Берҙәмлек ритмында” ҡалаҡсылар ансамблдәре фестивале үткәреү планлаштырыла. Проекттар башҡорт халҡының мәҙәни мираҫын һаҡлауға һәм үҫтереүгә йүнәлтелгән. 2015 йылда Харисовтың әүҙем ярҙамы менән Борай ауылында “Танып-Су” арт-галереяһы асылған. Галереяла рәссамдар, биҙәү-ҡулланма сәнғәте оҫталары әҫәрҙәре күргәҙмәләре, осрашыуҙар, ҡыҙыҡлы саралар даими үткәрелә. Арт-галерея сәнғәт һөйөүселәргә оҫталарҙың ижады, төрлө стилдәге уникаль эштәр менән танышырға, художестволы әҫәрҙәрҙе ысынбарлыҡта күрергә, матурлыҡты, үҙ төбәгенең, үҙ халҡының мәҙәниәтен аңларға, яратырға һәм ҡәҙерләргә өйрәтергә мөмкинлек бирә. Борай районында башҡорт ырыуҙары съездары ла уңышлы үтә. 2020 йылда Борай ауылында Елдәк ырыуы йыйыны, 2023 йылда Яңы Таҙлар ауылында «Ырыу ағасы» Бөтә Рәсәй фольклор фестивале һәм Уҡытыусы һәм остаз йылы сиктәрендә Таҙлар ырыуының республика съезы үтте. Илгиз Зөфәр улы көслө рухлы, кешеләргә ихтирамлы, күркәм холоҡло, тыуған яғының тарихын белгән һәм һаҡлаған аҫыл ир уҙаманы, милләтебеҙ өсөн баһалап бөткөһөҙ ҙур эштәр башҡара. Ул етәкләгән ҡоролтай милли байрамдарыбыҙҙы тергеҙеү, ауылды төҙөкләндереү, халыҡты сәләмәт тормошҡа йәлеп итеү, спорт ярыштары ойоштороу, “Айыҡ ауыл” конкурсын ойоштороу буйынса башҡа төбәктәргә өлгө булып тора. Ҡатыны Эльза Надим ҡыҙы менән ике ҡыҙ үҫтерәләр, улар юғары белем алған, бөгөн уңышлы эшләп йөрөйҙәр. Борай халҡы арҙаҡлы яҡташы менән хаҡлы рәүештә ғорурлана һәм Илгиз Зөфәр улына яуаплы эшендә яңы ҡаҙаныштар, рух ныҡлығы, һаулыҡ теләй. Г. РӘСҮЛЕВА әҙерләне. Фотолар геройҙың шәхси архивынан.