Сара бөйөк тарихсыға арналды

Өфө фән һәм технологиялар университетының Тарих һәм дәүләт идаралығы институтында Бөтә Рәсәй IV “Әсфәндиәров уҡыуҙары” фәнни-ғәмәли конференцияһы үтте. Сара билдәле тарихсы-ғалим, Халыҡтар дуҫлығы, Салауат Юлаев ордендары кавалеры Әнүәр Зәкир улы Әсфәндиәровтың ғәйәт ҙур фәнни мираҫына хөрмәт, уның хеҙмәттәрен өйрәнеү, йәш ғалимдарҙы тарих фәне ғилеменә ылыҡтырыу маҡсатында ике йылға бер тапҡыр үткәрелә. Конференцияла ҡатнашыусыларҙы Башҡортостан Башлығының Ижтимағи-сәйәси үҫеш буйынса идаралығы начальнигы Алексей Дербеко, Рәсәй тарихсылар йәмғиәтенең Башҡортостан бүлексәһе советы рәйесе Марат Мәрҙәнов, Өфө фән һәм технологиялар университетының Тарих һәм дәүләт идаралығы институты директоры Әминә Уразова, Рәсәй Йәмәғәт палатаһы ағзаһы, Рәсәй хәрби-тарихи йәмғиәтенең Башҡортостан төбәк бүлексәһе рәйесе Рәмил Насибуллин тәбрикләне. Ғилми йыйында республика һәм Рәсәй ғалимдарынан тыш, видеобәйләнеш алымында Белоруссия һәм Төркиә тарихсылары ла ҡатнашты. Сығыш яһаусылар Әнүәр Зәкир улының тарихсы булараҡ республиканың һәм тотош илебеҙҙең тарих фәне үҫешенә индергән өлөшөн айырып баһаланы. – Әнүәр Әсфәндиәров – исеме ҙур хәреф менән яҙылыуға лайыҡлы Уҡытыусы һәм Тарихсы. Уның кеүек шәхестәрҙең исемен онотмауҙы, йәштәрҙе улар өлгөһөндә тәрбиәләүҙе институттың бер миссияһы тип һанайбыҙ. Әнүәр Зәкир улы тотош бер ғилми институт башҡара торған фәнни эште бер үҙе атҡарып сыҡҡан иҫ киткес фиҙакәр тарихсы булды. Башҡортостан ауылдарын тарихын өйрәнеп, 20-нән ашыу китап сығарҙы. Был – шундай ҙур хеҙмәт! Ә тормошта ул ныҡ тыйнаҡ кеше ине, бер ваҡытта ла үҙен күрһәтергә тырышманы. Уҡытыусыбыҙҙың белеменә, фиҙакәрлегенә, әҙәплелегенә шул тиклем һоҡлана торғайныҡ. Һәм шундай оло ғалимдың ҡулында белем алыуыбыҙ менән бәхетлебеҙ. Ул үткәргән дәрестәр бөгөн дә иҫтә. Остазыбыҙҙы оло хөрмәт, рәхмәт хисе менән иҫкә алабыҙ, – тине сығышында Өфө фән һәм технологиялар университетының Тарих һәм дәүләт идаралығы институты директоры Әминә Уразова. Башҡа сығыш яһаусылар ҙа ғалимдың Башҡортостандың, баш ҡалабыҙ Өфөнөң, башҡорт халҡының тарихын өйрәнеү буйынса башҡарған хеҙмәттәренә ҙур баһа бирҙе, был хеҙмәттәр өйрәнелергә тейеш тип билдәләне. Фойела Әнүәр Әсфәндиәровтың китаптарынан, ғилми хеҙмәттәренән, ғаилә архивында һаҡланған наградаларынан торған күргәҙмә ойошторолдо. “Тормош юлдашымдың исемен һәм хеҙмәттәрен онотмауҙары, ошолай ололап иҫкә алыуҙары өсөн рәхмәт. Йәштәр Әнүәр Зәкир улының эштәрен өйрәнһен, уның кеүек республикабыҙҙың, халҡыбыҙҙың патриоты булһын ине, тигән теләктә ҡалам”, – тине ғалимдың хәләл ефете Клара Миһран ҡыҙы. Автор һәм Ф. Хәбибуллин фотолары.