Уҡыусыларға Р. Рәхимов исемендәге тәүге премия тапшырылды

Хәйбулла районында Балалар моделле китапханаһы базаһында фәнни - тикшеренеү конференцияһы үтте. Конференция “Тыуған яғым - Хәйбулла” район эҙләнеү эштәре конкурсы сиктәрендә ойошторолдо. Быйыл балалар моделле китапханаһы райондың тыуған яҡты өйрәнеүселәре ойошмаһы менән берлектә крайҙы өйрәнеүсе Рафаэл Сәләхетдин улы Рәхимовтың 90 йәшлек юбилейына арналған район эҙләнеү эштәре конкурсы иғлан иткәйне. Конкурста мәктәп йәшендәге балалар ҡатнашты. Ҡатнашыусылар ике йәш категорияһы буйынса баһаланды ( 7-нән 12 йәшкә тиклем һәм 13 йәштән 18 йәшкә тиклем). Сара йәш быуында тыуған яҡтың тарихына ҡыҙыҡһыныуҙы арттырыу, Хәйбулла районы тарихы, халҡы, алдынғы шәхестәрҙең ҡаҙаныштары, династиялар, һуғыш һәм хеҙмәт ветерандары тураһында тарихи материалдар туплау, йәш быуынды патриотик рухта тәрбиәләү, тыуған яҡтың тарихи мираҫына ихтирамлы ҡараш уятыу маҡсатында ойошторолдо.Положениеға ярашлы, конкурс ике этапта үтте. Тәүге этабында ҡатнашыусыларҙың эштәре тупланды. Абруйлы жюри ағзалары эштәрҙе ҡараны һәм 12 еңеүсе икенсе этапҡа – фәнни-тикшеренеү конференцияһына йыйылды. Район тикшеренеү эштәре конкурсына бөтәһе 44 эш ҡабул ителде. Биш номинация буйынса килгән эштәрҙе абруйлы жюри ағзалары – Хәйбулла районының үҙәкләштерелгән китапханасылар системаһы директоры Аксана Сынбулатова, тарих һәм крайҙы өйрәнеү музейы директоры Рәзилә Байғускарова, район архив хеҙмәте мөдире Илһөйәр Юламанова ҡараны. Рафаэл Сәләхетдин улы Рәхимовтың ҡыҙы Рәсимә Туғыҙбаева ла эштәр менән танышып үҙ баһаһын ҡуйҙы. Фәнни-тикшеренеү конференцияһының тәүге өлөшөндә финалға сыҡҡан 12 ҡатнашыусы бала эҙләнеү эштәренең ҡыҫҡартылған варианты менән сығыш яһаны. Жюри ағзалары һәр сығышты ентекле тыңлап тейешле баһа бирҙе.12 йәшкә тиклемге ҡатнашыусылар араһында 1 урынға Варвара Жукова (Аҡъяр) лайыҡ булды. Икенсе урынға Нуриман Такалов (Аҡъяр), Азалия Аралбаева (Аҡъяр) сыҡты, өсөнсө урынды Дияр Ғәлин (Аҡъяр), Ғайсар Итбаев (Бүребай), Диниә Туҡбаевалар (Иләс) яуланылар. 12 йәштән өлкән финалсылар араһында Айзилә Әминева (Оло Әбеш) лайыҡлы рәүештә 1 урынды алды, икенселә - Илназ Байғабулов (Атингән), Яна Канакина (Маҡан) , өсөнсөлә - Нәзилә Аскарова (Иләс), Гүзәл Мәжитова (Подольск).Иң ҙур баһа – Рафаэл Рәхимов исемендәге тәүге премияға Варвара Жукова лайыҡ булды. Рәсимә Рафаэл ҡыҙы шулай уҡ иң йәш ҡатнашыусыға (Дияр Ғәлин), башҡорт телендә матур сығыш яһаусыға (Диниә Туҡбаева) һәм беренсе урынға сыҡҡан финалсыларҙы әҙерләүсе уҡытыусыларға (Мәҙинә Нәсибулла ҡыҙы Рәшитова, Наталья Александровна Цыкало) бүләктәр тапшырҙы. Фәнни - тикшеренеү конференцияһының икенсе өлөшө район эҙләнеү эштәре конкурсында еңеүселәрҙе бүләкләүгә арналды.Конкурста әүҙем ҡатнашҡан барлыҡ уҡыусыларға һәм етәкселәренә, ата-әсәләренә, фәнни-ғәмәли конференцияла сығыш яһаусыларға, конкурста ҡатнашыусыларҙы ылыҡтырған китапханасыларға рәхмәт һүҙҙәрен белдерәбеҙ. Фото һәм текст сығанағы: Сәлимә Байгилдина.