“Алыштырғыһыҙ етәксе!” тиҙәр

Эльвера Иманғолова – Башҡортостандағы иң әүҙем урындағы ҡоролтай рәйестәренең береһе. Ойошмаға ул һуңғы дүрт йылда етәкселек итә, ә дөйөм алғанда, фекерҙәш-рухташтары менән ул йәмғеһе ике тиҫтә йылдан ашыу бергә атлай, атап әйткәндә, район мәғариф бүлегендә 2002 йылда методист булып эшләй башлағандан алып әүҙем ижтимағи эшмәкәрлек алып бара. Эльвера Ғүмәр ҡыҙы сығышы менән Ишембай районы Байғужа ауылынан. Маҡсатлы ауыл ҡыҙы Клара Рәхмәтулла ҡыҙы һәм Ғүмәр Низам улы Баһауетдиновтарҙың татыу ғаиләһендә милли рухты һеңдереп үҫә. Бала саҡтан башҡорт телен өйрәнеү, башҡорт матбуғатын уҡыу уға киләсәктә башланғыс кластар, башҡорт теле уҡытыусыһы булырға этәргес биргән. Был хаҡта ҡоролтай рәйесе үҙе лә йыш ҡына иҫкә ала: “Гәзит-журналдарҙы башынан аҙағынаса уҡый инек, хатта төрлө рецептарҙы киҫеп алып, махсус дәфтәргә йәбештереп, бешерергә өйрәнә торғайныҡ”, – ти ул. 1995 йылда Стәрлетамаҡ педагогия институтын (хәҙерге Өфө фән һәм технологиялар университетының Стәрлетамаҡ филиалы) тамамлағас, Стәрлетамаҡ районы Яңы Барятино мәктәбендә хеҙмәт юлын башлай йәш белгес. Әйткәндәй, районда иң беренселәрҙән булып урыҫ мәктәбендә башҡорт телен уҡыта башлай. Бер аҙ тәжрибә туплағас, үткер, әүҙем, шул уҡ ваҡытта белемле, талапсан йәш белгесте район мәғариф бүлегенә эшкә саҡыралар. Был урында ул барлыҡ һөнәри баҫҡыстарҙы уҙа, методистан алып, бүлек начальнигы, артабан район хакимиәте башлығының социаль мәсьәләләр буйынса урынбаҫары вазифаһына тиклем үҫә. Бөгөн дә ошо урында эшләй, бер үк ваҡытта районда милли мөхитте һаҡлау һәм үҫтереүҙә әүҙем йәмәғәт эшмәкәре булараҡ та танылған. Яуаплылыҡ, фиҙакәрлек кеүек сифаттар эшенең һөҙөмтәлелеген билдәләй. Мәҫәлән, “Айыҡ ауыл” конкурсын район кимәлендә ойошторғанда ла ауыл халҡы уйланһын, йәш быуын спортҡа, мәҙәни тормошҡа, ватансылыҡ тәрбиәһенә ылыҡһын, тип тырыша. Ул шәхсән рәүештә ауылдар буйлап проблемалы ғаиләләрҙе тикшерергә лә, аңлатыу эштәре алып барырға ла, шул уҡ ваҡытта дан әсәләр, ғаиләләр менән дә осрашырға ла ваҡыт таба. Еңелдән түгел, мәгәр районда күҙгә күренеп социаль күрһәткестәр яҡшыра. Эльвера Иманғолованың ошо райондың Айыусы ауылынан сыҡҡан Юрматы ырыуы шәхесе, 1813-1814 йылдарҙа рус армияһы составында сит ил походтарында ҡатнашҡан башҡорт полкы командиры булған Ҡаһым Түрәнең (Мырҙашев) исемен күтәреү буйынса башҡарған проекттары ла иғтибарға лайыҡ. Һәйкәл асыу, конференциялар, экскурсиялар ойоштороу булһынмы, Эльвера Ғүмәр ҡыҙы һәр сараның уртаһында ҡайнай һәм төп ойоштороусыларҙың береһе булып тора. Шул уҡ ваҡытта район ҡоролтайы илдә барған ваҡиғаларға ла битараф түгел: яугирҙарыбыҙға гуманитар ярҙам йыйыу, ғаиләләренә ярҙам күрһәтеү кеүек эштәрҙән ситтә ҡалмай. Ғөмүмән, күптәрҙе берләштереүсе рухи көс булып тора ойошма. – Әгәр бөгөн бер генә башҡорт балаһы башҡортса һөйләшергә өйрәнһә, бер генә башҡорт кешеһе үҙен ошо милләт вәкиле икәнлеген тойоп, ғорурлыҡ кисерһә, көн бушҡа йәшәлмәгән, – ти ул йәмәғәтселек эше хаҡында. Эше менән дә, ғаиләһе менән дә бәхетле ханым ул – тормош иптәше Рөстәм Рамаҙан улы менән ике ҡыҙ үҫтергәндәр. Эльвера Ғүмәр ҡыҙы фиҙакәр хеҙмәте өсөн маҡтаулы исемдәргә лайыҡ: “Башҡортостандың мәғариф алдынғыһы” билдәһе, БР Мәғариф министрлығының, РФ мәғариф һәм фән министрлығының Почет грамоталары һәм башҡа бихисап наградалары менән бүләкләнгән. Әммә иң ҙур баһа – халыҡтан, ти Эльвера Иманғолова. Ә уны халыҡ тура һәм ғәҙел ҡуя – алыштырғыһыҙ ҡоролтай рәйесебеҙ, етәксебеҙ тиҙәр уның хаҡында. Эльвера Ғүмәр ҡыҙына артабан да уңыштар, һаулыҡ һәм ҡаҙаныштар теләйбеҙ! Р. Мансуров әҙерләне. Фотолар геройҙың шәхси архивынан.