Алдан хәбәр итеүебеҙ буйынса, бөгөн Мәскәү ҡалаһында мөһим ваҡиға бара. ВДНХ-лағы “Рәсәй” күргәҙмәһендә – Башҡортостан көнө. Республика экспозицияһына килеүселәрҙе сараның абруйлы ҡунаҡтары байрам менән ҡотланы. Видеосәләмләүҙе Донецк Халыҡ Республикаһы Башлығы Денис Пушилин ебәргән. – Башҡортостан менән Донбасс күптәнге дуҫлыҡ ептәре менән бәйләнгән. Башҡортостан Донбасста йәшәүселәргә һәр саҡ ярҙам итте. Бөйөк Ватан һуғышы йылдарында беҙҙең олатайҙарыбыҙ һәм ҡарт олатайҙарыбыҙ уртаҡ Тыуған илен дошмандан иңгә-иң терәп һаҡлаған. Беҙ 112-се Башҡорт кавалерия дивизияһының батырлығын хәтерләйбеҙ, немец-фашист илбаҫарҙарын еңгән кешеләрҙе хөрмәтләйбеҙ. Бөгөн дә Башҡортостан яугирҙәре алғы һыҙыҡта беҙҙең халыҡты һәм Рәсәй мәнфәғәттәрен яҡлай, – тине Денис Пушилин. – Махсус хәрби операция тамамланмаһа ла, беҙ емерелгән объекттарҙы тергеҙеү менән шөғөлләнәбеҙ. Башҡортостан беҙгә бында ла ярҙам итә. Беҙҙең өсөн республика менән хужалыҡ, мәҙәни һәм спорт бәйләнештәре мөһим. Ярҙамығыҙ өсөн ысын күңелдән рәхмәтлебеҙ. Беҙҙең хеҙмәттәшлек йылдан-йыл нығыныр, тип ышанам. Башҡортостан һәр саҡ сәскә атһын һәм уңышлы булһын. Ҡырым Республикаһы Башлығы Сергей Аксенов үҙенең видеомөрәжәғәтендә Башҡортостандың илдең иҡтисади ҡеүәтен һәм суверенитетын нығытыуға индергән өлөшөн билдәләне. – Һеҙ Ватаныбыҙҙың үҫешенә һәм уның именлеген тәьмин итеүгә тос өлөш индерәһегеҙ. Республикала йәшәүселәрҙең һәммәһенә лә именлек, сәскә атыуҙарын һәм йәшәү сифатын күтәреүҙәрен теләйем, – тине ул. Беларусь Республикаһының Рәсәйҙәге Ғәҙәттән тыш һәм Тулы хоҡуҡлы илсеһе Дмитрий Крутой Башҡортостан менән төбәк-ара хеҙмәттәшлекте тормошҡа ашырыу мөмкинлектәрен юғары баһаланы. – Рәсәй һәм Беларусь глобаль геосәйәси саҡырыуҙарға бергәләп уңышлы ҡаршы тора. Һуңғы йылдарҙа илдәребеҙ араһында яңы төбәк-ара бәйләнештәр булдырылды. Башҡортостан был йәһәттән бик сағыу өлгө булып тора, – тип һөйләне Дмитрий Крутой. – Беҙҙә берлектәге проекттар бик күп. Һәм шуның менән бер рәттән үҙ-ара килешеп эш итеүҙе артабан киңәйтеү өсөн ҙур потенциал ҡала. Ҡаҙағстандың Рәсәйҙәге Ғәҙәттән тыш һәм Тулы хоҡуҡлы илсеһе Даурен Абаев төбәк-ара хеҙмәттәшлектең өҫтөнлөклө әһәмиәтен билдәләне. - Үҙ-ара килешеп эш итеү сиктәрендә Башҡортостан иғтибарыбыҙ үҙәгендә тора. Астана менән Өфө араһында тәрән мәҙәни-тарихи тамырлы тығыҙ бәйләнеш булдырылған. Төрлө йүнәлештәрҙә хеҙмәттәшлекте үҫтереү буйынса пландарыбыҙ ҙур, – тип белдерҙе ул. – “Рәсәй” халыҡ-ара күргәҙмә-форумында Башҡортостан көнөн асыу менән ҡотлайым. Республикабыҙға именлек һәм сәскә атыуҙарын теләйем. Рәсәйҙең Спорт көрәше федерацияһы президенты Михаил Мамиашвили үҙ сығышында Башҡортостандың төрлө өлкәләрҙәге даими үҫешен һыҙыҡ өҫтөнә алды һәм төбәктә педагогтарҙы уңышлы әҙерләүгә иғтибар бүлде. – Уҡытыусы, остаз, тренер – бөтә был кешеләр йәш быуындың тормош юлында икенсе ата-әсә булып китә. Һәм Башҡортостан остазлыҡ институтын үҫтереүҙә алдынғы төбәктәрҙең береһе булып тора. “Ауыл тренеры” спорт педагогтарына ярҙам республика программаһы бөтә ил өсөн өлгө булып тора ала, – тип билдәләне Михаил Мамиашвили. – Бындай алым ярҙамында илдә көслө, аҡыллы һәм яуаплы йәштәр тәрбиәләнәсәгенә ышанам. Республика спортын үҫтереүгә ҙур өлөш индергәне өсөн Радий Хәбиров Михаил Мамиашвилиға “Башҡортостандың атҡаҙанған физик культура хеҙмәткәре” тигән маҡтаулы исем бирҙе. “Рәсәй” күргәҙмәһе ҡунаҡтарын Башҡортостан көнө менән махсус хәрби операцияла ҡатнашыусыларға ярҙам иткән дин әһелдәре - имам Хәмзә хәҙрәт һәм протоиерей Виктор Иванов та ҡотланы. Фото: Башҡортостан Башлығы сайты.