Көйөргәҙе районында күп балалы ғаиләләргә төрлө яҡтан даими ярҙам күрһәтелеп тора. Шул иҫәптән торлаҡ менән тәьмин итеү буйынса дәүләт программаларын үтәү буйынса ла ҙур эштәр башҡарыла. Был эштәр шулай уҡ “Торлаҡ һәм ҡала мөхите” (“Жилье и городская среда”) милли проекты буйынса Владимир Путиндың “Май указдарына” ярашлы ла үтәлә. Күптән түгел йәнә бер ғаилә яңы йортло булыу бәхете кисерҙе районда. “Бала бағыу – ҙур ҡыуаныс, ә ғаиләлә бер нисә бала үҫһә – бигерәк тә ҙур бәхет. Шул уҡ ваҡытта был бөйөк эш яуаплылыҡ та, тырышлыҡ та талап итә. Күп балалы ғаиләләргә дәүләт ярҙамы мөһим һәм мотлаҡ булырға тейеш!” – тип билдәләп үтте ғаилә яңы нигеҙҙәре менән ҡотлаған мәлдә район хакимиәте башлығының социаль мәсьәләләр буйынса урынбаҫары Данил Акилов. Әйткәндәй, күп балалы ғаиләләрҙе торлаҡ менән тәьмин итеүҙә биш һәм унан да күберәк балалар тәрбиәләгән ата-әсәләр айырым программа буйынса иҫәптә тотола. Был дәүләт ярҙамы БР Министрҙар кабинетының 2002 йылдың 11 мартында сыҡҡан Ҡарарына ярашлы башҡарыла. Заявканы Күп функциялы үҙәктәр офисында тапшырырға мөмкин. Программала ҡатнашыу өсөн ғаилә: - бәлиғ булмаған (18 йәше тулмаған) биш йәки унан күберәк бала тәрбиләргә; - ғаилә торлаҡ шарттарын яҡшыртыуға хоҡуҡлы һәм был йәһәттән урындағы үҙидаралыҡ органында иҫәптә торорға; - йәшәү урыны буйынса Башҡортостанда теркәлергә тейеш. Торлаҡ һатып алыуға социаль түләү сиратҡа торған тәртиптә тапшырыла. Сиратҡа ни тиклем иртә торғанһығыҙ, шул тиклем яҡшыраҡ. Әйткәндәй, үҙенең сәхифәһендә Данил Акилов был яҙмалағы фотолар ни бары алты ай менән төшөрөлдө, тип билдәләй. Тимәк, сертификаттар тапшырыу нормаға, сиратҡа ярашлы һәм тиҙ башҡарыла бара. Фотолар Данил Акиловтың социаль селтәрҙәге сәхифәһенән алынды.