Күмертау ҡала дауаханаһына, “Һаулыҡ һаҡлау” милли проектының тәүге звеноны яңыртыу программаһына ярашлы, ультратауыш диагностика аппараты алынды. Ике йыл эш дәүерендә яңы ҡорамалда 30 меңдән ашыу тикшереү үткәрелгән. Ультратауыш диагностикаһы донъяла утыҙ йылдан ашыу ҡулланыла. Был ысул ныҡ таралған, сөнки ул хәүефһеҙ, төрлө йәштәге кешеләргә медицина тикшереүе үткәреү мөмкин. Заманса ҡорамалды ҡулланыу даирәһе киң. Уның ярҙамында акушерлыҡ, гинекология, абдоминаль, маммология, урология һәм кардиология тикшереүҙәре үткәрергә мөмкин. Ул файҙаланыуҙа ябай, тикшереүҙәрҙе тиҙ башҡарырға ярҙам итә. –Был заманса техника табипҡа реаль ваҡытта күләмле сканерлауҙы үткәрергә булышлыҡ итә, мәҫәлән, уның ярҙамында ҡарындағы тыуасаҡ сабыйҙың хәрәкәтен күҙәтергә мөмкин,– тине ультратауыш диагностикаһы табибы Анна Никитина. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.