Радий Хәбиров Рәсәй Президенты Советы ултырышында ҡатнашты

1 декабрҙә Башҡортостан Башлығы Радий Хәбиров Өфөләге Торатау конгресс-залында Граждандар ҡануниәтен кодификациялау һәм камиллаштырыу буйынса Президент Советының күсмә ултырышында ҡатнашты. Адвокаттар көнө алдынан «Венедикт уҡыуҙары» беренсе Халыҡ-ара фәнни-ғәмәли конференцияһы сиктәрендә үткәрелә. Дәүләт Думаһының төҙөлөш һәм ҡануниәт буйынса комитеты рәйесе Павел Крашенников билдәләүенсә, ситтән тороп ултырыш үткәреү урыны итеп Башҡортостандың һайланыуы осраҡлы түгел. "Һуңғы 20 йылда республикала юридик белем биреү юғары кимәлгә етте. Башҡортостан юристар ассоциацияһы — Рәсәйҙең алдынғы профессиональ берекмәләренең береһе», — тине Павел Крашенников. Радий Хәбиров үҙ сығышында республика өсөн Граждандар ҡануниәтен кодификациялау һәм камиллаштырыу буйынса Президент Советы ултырышын үткәреү оло хөрмәт, тип һыҙыҡ өҫтөнә алды. «Башҡортостанда юридик белем биреүҙе үҫтереү иҡтисадтың, дәүләт идаралығының, тормоштоң бөтә өлкәләренең ихтыяждарын башлыса беҙҙең юридик мәктәптәрҙе тамамлаусылар тәьмин итә», — тине төбәк башлығы. Рәсәй Федерацияһы Советының фән, мәғариф һәм мәҙәниәт буйынса комитеты рәйесе Лилиә Ғүмәрова әйтеүенсә, Парламенттың юғары палатаһы Советтың һығымталарына иғтибарлы. Рәсәй Граждандар кодексына интеллектуаль милек мәсьәләләренә ҡағылышлы төҙәтмәләр индереү буйынса һигеҙ йыл самаһы эш алып барылыуы хаҡында сенатор хәтергә төшөрҙө. Закон сығарыусылар интеллектуаль эшмәкәрлек һөҙөмтәләрен коммерциялаштырыуҙың юридик ҡоралын тапҡан. «Интеллектуаль милекһеҙ бер тармаҡта ла илдең технологик суверенитетын тәьмин итеү мөмкин түгел. Шул уҡ ваҡытта хоҡуҡи мәҙәниәт булдырырға һәм был өлкәлә хоҡуҡи грамоталылыҡты арттырырға кәрәк. Был иң мөһим ҡорал, шул иҫәптән бюджетты тулыландырыу, төбәктәр иҡтисадын үҫтереү өсөн мөһим», — тине Лилиә Ғүмәрова. Совет ағзалары Рәсәй Федерацияһы Граждан кодексы положениеларына төҙәтмәләр индереү менән бәйле хоҡуҡи мәсьәләләрҙе тикшерҙе. Ултырышта шулай уҡ «Банкротлыҡ тураһында» федераль законға төҙәтмәләр ҡаралды.Фото: Башҡортостан Хөкүмәте сайтынан алынды.