Радий Хәбиров уҡыу йортоноң 75 йыллығы менән ҡотланы

1 декабрҙә Өфөлә Башҡортостан Башлығы Радий Хәбиров Өфө дәүләт нефть техник университетының 75 йыллығына арналған тантаналы йыйылышта ҡатнашты. Төбәк етәксеһе университет ветерандарын, уҡытыусыларын, студенттарҙы уҡыу йортоноң юбилейы менән ҡотланы һәм Рәсәйҙең һәм Башҡортостандың дәүләт наградаларын тапшырҙы. - Хөрмәтле дуҫтар! Тантана ҡунаҡтары! Университетты тамамлаусылар! Һеҙҙе уҡыу йортоноң 75 йыллығы менән ҡотлайым! Был - республика өсөн мөһим дата. Беҙҙең нефть университеты - Башҡортостандың юғары мәктәбе флагмандарының береһе, бренды, тип тә әйтер инем. 75 йыл буйы бында нефть-газ өлкәһенә, химия технологиялары, машиналар төҙөү, төҙөлөш, архитектура һәм башҡа өлкә өсөн 125 меңдән ашыу белгес әҙерләнгән. Был уҡыу йортон тамамлаусылар һәр саҡ һорау менән файҙаланды. Бөгөн улар Рәсәй төбәктәрендә һәм башҡа илдәрҙә хеҙмәт итә. Күптәре ҙур ғалим, күренекле дәүләт эшмәкәре, нефть-газ һәм энергетика компаниялары етәкселәре һәм беренсе класлы белгес булып китте. Үҙенең иң яҡшы традицияларын дауам итеп, ӨДНТУ фәнни-белем биреү комплексы, Рәсәйҙең терәк вузы, илдең эре энергетик компанияларының ышаныслы партнеры булараҡ етеҙ үҫешә. Бында 400 программа буйынса 23 мең студент һәм аспирант, шулар иҫәбендә - 2 меңдән ашыу яҡын һәм алыҫ сит илдәрҙән, белем ала. Университет беҙҙең нефть химияһы кластеры үҫешендә мөһим роль уйнай, донъя кимәлендәге Евразия ғилми- белем биреү үҙәгенең 10 технологик проектының 5-еһен тормошҡа ашыра. Ул “Роснефть” һәм “Газпром нефть” менән тығыҙ бәйләнештә, бында фәнни-белем биреү үҙәктәре булдырылған. Һеҙҙең коллектив үҙенең бай традицияларына, технологияларына һәм инновацияларына таянып, артабан да республика һәм илдең иҡтисади ҡеүәтен арттырырҙай заманса кадрҙар әҙерләр тип ышанам, - тине сығышында Радий Хәбиров. Рәсәй фән һәм юғары белем биреү министры урынбаҫары Ольга Петрова уҡыу йортоноң юбилейы айҡанлы видеоҡотлау ебәрҙе. Ул Башҡортостан коллегаларының мөһим эш башҡарыуын билдәләп, уларға артабан да яңынан-яңы уңыштар теләне. Тантаналы сарала шулай уҡ Башҡортостандан Федерация Советы сенаторы Олег Голов, Рәсәй Дәүләт Думаһы депутаты Рафаэль Мәрдәншин һәм “Роснефть” компанияһы вице-президенты Геннадий Букаев ҡатнашты. Сара байрам концерты менән тамамланды. https://glavarb.ru/rus/press_serv/novosti/172436.html