Өфөнөң һаулыҡ һаҡлау учреждениеларын яңыртыу буйынса күләмле программаға старт бирелде

30 ноябрҙә Өфөлә Башҡортостан Башлығы Радий Хәбиров 2-се ҡала балалар поликлиникаһында булды һәм Өфөнөң һаулыҡ һаҡлау учреждениеларын яңыртыу буйынса күләмле программаға старт бирҙе. Хәтерегеҙгә төшөрәбеҙ, төбәк етәксеһе был проектты 2023 йылдың июнендә күсмә “Һаулыҡ һаҡлау сәғәте”ндә иғлан итте. Мәҫәлән, 2024 йылда программаны тормошҡа ашырыу өсөн бюджетта 500 миллион һум ҡаралған. Төбәктең Һаулыҡ һаҡлау министрлығы капиталь ремонт башларға ниәтләгән биналар исемлеген билдәләне. Улар иҫәбендә – Кувыкин урамындағы 2-се балалар поликлиникаһы корпусы. Ә яңыртыу бөтәһе 118 медицина учреждениеһына ҡағыла. Бынан тыш, программа сиктәрендә 700-ҙән ашыу берәмек яңы ҡорамал һатып алырға ниәтләйҙәр. Башҡортостан Башлығы республиканың һаулыҡ һаҡлау министры Айрат Рәхмәтуллин менән Өфө поликлиникаларын яңыртыуҙың “юл картаһын” тикшерҙе һәм программаны тормошҡа ашырыу ваҡытын 2030 йылға тиклем оҙайтырға кәрәклеген билдәләне. Шулай итеп, ул ете йылға иҫәпләнгән. – Өфө поликлиникаларын ремонтлауға һәм яңыртыуға йүнәлтергә ниәтләгән дөйөм сумма һигеҙ миллиард һум тәшкил итәсәк. 2025 йылдан ошо маҡсатҡа йылына 1,5 миллиард һум бүлеү күҙаллана. Мөһим момент – пациенттар өсөн берҙәм брендбук, заманса регистратура һәм уңайлы көтөү зоналары булдырыу. Беҙ Өфөгә һаулыҡ һаҡлау өлкәһендә ярҙам итергә кәрәк тип иҫәпләйбеҙ. Был балалар поликлиникаһын да ремонтлайбыҙ. Бында яҡынса 60-70 миллион һум китә, – тип һыҙыҡ өҫтөнә алды Радий Хәбиров. 2-се балалар поликлиникаһының баш табибы Эльвира Бикмәтова медицина учреждениеһының 40 меңдән ашыу кешене хеҙмәтләндереүен һөйләне. Көн һайын белгестәр бер меңгә яҡын пациентты ҡабул итә һәм 200 самаһы өйгә барып хеҙмәтләндерә. Башҡортостан Башлығы табиптарҙың кабинеттарын ҡараны, уларҙың эш шарттары, шулай уҡ поликлиниканың йыһазландырылыуы менән танышты. 2019-2020 йылдарҙа учреждение 35 берәмек төрлө медицина техникаһы, шул иҫәптән офтальмолог, оториноларинголог кабинеттары, клиник лаборатория, дауалау физкультураһы өсөн ҡорамалдар, шулай уҡ компьютер комплекстары менән УЗИ һәм ЭКГ аппараттары алған. Республиканың һаулыҡ һаҡлау министры Айрат Рәхмәтуллин хәбәр итеүенсә, поликлиникала табиптар һәм урта медицина персоналы өсөн яңы махсус кейемде һынап ҡарайҙар. Уны быйыл “Алға” махсус иҡтисади зонаһы биләмәһендә эшләй башлаған ZASPORT фабрикаһында тегергә планлаштыралар. – Беҙ эксперимент сифатында Өфөнөң беренсел звеноһы белгестәренә яҡшы материалдан тегелгән уңайлы, заманса медицина костюмдарын кейҙерергә булдыҡ. Был эште башлаясаҡбыҙ, һуңынан табиптарҙың баһаларын ҡараясаҡбыҙ, – тип билдәләне Радий Хәбиров. Бынан тыш, республиканың Һаулыҡ һаҡлау министрлығы төбәктең баш ҡалаһы өсөн “Сәләмәт Өфө” медицина ярҙамы күрһәтеү мөмкинлеген арттырыу проектын әҙерләгән. Ул ҡаланың яңы торлаҡ комплекстарында педиатрҙар һәм терапевтар кабинеттарын ойоштороуҙы күҙ уңында тота. Айрат Рәхмәтуллин билдәләүенсә, был яңы йорттарҙа йәшәүселәр һәм медицина белгестәре өсөн уңайлы буласаҡ, ҡала поликлиникаларына йөкләмәне кәметергә мөмкинлек бирәсәк. Дим һәм Инорста тәүге табип офистары асылған. Фото: glavarb.ru