Бөгөн Шишмә районындағы “Патриот” хәрби-патриотик паркында Башҡортостан Дәүләт Йыйылышы – Ҡоролтайҙың фән, мәғариф, мәҙәниәт һәм йәштәр сәйәсәте комитеты ағзалары сираттағы ултырыштарын үткәрҙе. Комитет рәйесе Айбулат Хажин бындай тәжрибәне артабан да ҡулланырға тәҡдим итте. Көн тәртибенә ҡуйылған мәсьәләләр – “Башҡортостан Республикаһының матди булмаған мәҙәни мираҫы тураһында”, “Мәҙәниәт” тураһында” закон проекттарына үҙгәрештәр индереү.Был үҙгәрештәр тураһында ентекләп комитет рәйесе урынбаҫары Заһир Хәкимов һөйләне. Икенсе уҡыуҙан үткән закон проекттарына үҙгәрештәр ҡабул ителде. Айбулат Хажин көҙгө сессия эшен йәнләндереү йәһәтенән күреләсәк саралар хаҡында һөйләне. Артабан депутатар “Патриот” хәрби-патриотик паркының эше менән ентекләп танышты. Парктың генераль директор урынбаҫары — Хәрби-патриотик белем биреү уҡыу-методик үҙәге директоры Никита Рекрут экскурсия үткәрҙе, үҫмерҙәрҙең шөғөлләнеү базаһы, йәшәү шарттары менән таныштырҙы. Әлеге мәлдә бында Нефтекама ҡалаһынан һәм Стәрлебаш районынан үҫмерҙәр шөғөлләнә. Йыл башынан парк 9 меңдән ашыу кешене ҡабул иткән. Был мәктәптәрҙең 10-сы класс уҡыусылары һәм колледждарҙың 1, 2-се курс студенттары. Бер юлы парк 200 кешене ҡабул итә ала. Тиҙҙән уның филиалдары ла асыласаҡ. Айбулат Хажин билдәләүенсә, артабан “Патриот” паркын үҫтереү буйынса эш алып барыласаҡ.Фән, мәғариф, мәҙәниәт, йәштәр сәйәсәте һәм спорт буйынса комитет рәйесенең беренсе урынбаҫары Рөстәм Әхмәҙинуров ултырыштан һуң курсанттар менән осрашып, илһөйәрлек дәресе үткәрҙе. Илнур Сәлихов, Р. Ғарипов исемендәге 1-се Башҡорт республика гимназияһы директоры: - Был паркта беҙ йыш булабыҙ. Ярыштарҙа ла ҡатнашҡаныбыҙ булды. Гимназияның илленән ашыу укыусыһы бында шөғөлләнеп, һалдат бутҡаһы тәмләп ҡайтты. Һуңғы осорҙа ил кимәлендә лә, Башҡортостан Хөкүмәте лә илһөйәрлекте тәрбиәләүгә ҙур әһәмиәт бирә. Башҡортостандың Дәүләт Йыйылышы – Ҡоролтай депутаттарының барыһы ла комитет ултырыштарын сиратлап был паркта үткәрәсәк. Был алымдың тәрбиә эшенә ҙур йоғонто яһауына шигем юҡ. Илгиз Абдуллин фотолары.