Ошо көндәрҙә Өфө фән һәм технологиялар университетының Хоҡуҡ институтында Башҡортостан Республикаһы Юғары Суды етәкселеге – Башҡортостан Республикаһы Юғары Суды рәйесе Рәил Шәйҙуллин, уның урынбаҫары Азат Ғизәтуллин, Судьялар советы рәйесе Татьяна Писарева, Енәйәт эштәре буйынса суд коллегияһының апелляция инстанцияһы рәйесе Йәүҙәт Иҙрисов, административ эштәр буйынса суд коллегияһының суд составы рәйесе вазифаһын башҡарыусы Наталья Козлова студенттар, буласаҡ юристар менән осрашты һәм Рәсәй Федерацияһы Конституцияһының ғәҙеллек урынлаштырыуҙағы әһәмиәте, суд системаһында эшләү тәжрибәһе хаҡында һөйләне, суд эшмәкәрлеге менән бәйле мөһим һорауҙарҙы яҡтыртты, йәштәрҙең һорауҙарына яуап бирҙе. Рәил Шәйҙуллин студенттарҙы дәүләт байрамы – Рәсәй Федерацияһы Конституцияһы көнө менән ҡотланы, шул уҡ ваҡытта юғары норматив-хоҡуҡи акт тураһында ҡайһы бер мәғлүмәттәр менән уртаҡлашты. "Рәсәй Федерацияһы Конституцияһының эталон данаһы, Президент инаугурацияһында ҡулланылған китап, ҡыҙыл күн тышлы китап булып тора һәм Мәскәү Кремлендә, Рәсәй Президенты китапханаһында һаҡлана”, - тип һөйләне Рәил Рәшит улы. – Бик күп һәм етди һорауҙар бирелде, студенттарҙы хоҡуҡ ҡулланыу һәм хоҡуҡ сығарыу проблемалары борсой. Балаларыбыҙҙың бындай әүҙемлеге, судьяларҙың һөнәре һәм эш үҙенсәлектәре менән ҡыҙыҡһыныуы ҡыуандырҙы. Юҡҡа ғына “судья булырға теләмәгән юрист насар юрист” тип әйтмәйҙәр. Киләсәктә студенттарыбыҙҙың бер өлөшө лә был лайыҡлы һөнәр вәкилдәренә әйләнер, ә бындай осрашыуҙар уларҙың һөнәри траекторияһын билдәләргә мөмкинлек бирер, тип ышанам. Уҙаҡташтарыбыҙға һәм шәхсән Башҡортостан Республикаһы Юғары Суды рәйесе Раил Рәшит улы Шәйҙуллинға әүҙем хеҙмәттәшлек иткәндәре өсөн рәхмәт белдерәбеҙ. Алда күп яңы проекттар һәм берлектәге саралар тора, – тине Хоҡуҡ институты директоры Руслан Зәйнуллин. Фото: Руслан Зайнуллин (vk.com)