Бөгөн Башҡортостан Башлығы Радий Хәбиров тура эфирҙа республика халҡы менән аралаша. Уға ошо минутҡа меңдән ашыу һорау килгән. Радий Фәрит улы әйтеүенсә, “тура бәйләнеш” уның өсөн бурыс түгел, ә кире бәйләнеш, республикалағы хәлдәрҙе, халыҡтың Хөкүмәт эшмәкәрлеген нисек баһалауын белеү өсөн мөмкинлек. “Төрлө һорауҙарға яуап биреп ултырыуы еңел түгел, әлбиттә. Мин ҡайһы берҙәрен ҡарап сыҡтым, уларҙың күптәре “көндәлек” мәсьәләләр: юл ремонтлау, газ үткәреү һәм башҡалар. Был кешеләрҙе борсоған проблемаларҙы тиҙ арала хәл ителеү юлы”, – тине ул. Көтөлгәнсә, һорауҙарҙың төп өлөшө махсус хәрби операция темаһына арналды. Ватан яугирҙәре ғаиләләре комитеты етәксеһе Эльвира Мацкевич үҙҙәренең комитетының эшмәкәрлеге тураһында һөйләне һәм һорауын бирҙе. “Республиканан бик күп гуманитар ылауҙар ебәрелгәнен беләбеҙ. Ошо көндәрҙә генә 101-се ылау китте. Гуманитар ярҙам һәм егеттәргә яҡындары ебәргән адреслы ярҙам барып етәме икән?” - тип һораны ул. – Беҙҙә логистика һәйбәт ойошторолған. Башҡортостан юлы менән башҡа төбәктәр ҙә китте. Мин яңыраҡ Красный Лучта булған саҡта келәттәрҙә ебәреүҙе көткән адреслы посылкалар ятҡанын күрҙем. Командирҙарҙан шәхсән белештем. Улар, әлбиттә, барып етә, беҙҙә буталыш юҡ тип яуап бирҙе. Бәлки, ваҡыт менән проблемалар килеп сығыуы ихтимал. Сөнки ябай водителдәр уны алғы һыҙыҡҡа алып барып еткерә алмай, командирҙар килеп алырға тейеш. Келәт тулы. Әлеге ваҡытта бик ихтыяжлыҡ булмаған әйберҙәр ҙә ята, уларҙы яйлап алып барасаҡтар, - тине. Эльвира Мацкевичтың ире - махсус хәрби операцияла ҡатнашыусы яугир. Ә алты йәшлек улы Яңы йылға Ҡыш бабайҙан бөтә балалар ҙа үлемһеҙ булһын һәм тиҙерәк һуғыш бөтһөн тип теләгән. Көйөргәҙе районы хакимиәте башлығының кәңәшсеһе, МХО-ла ҡатнашыусы Владимир Хлынцев, башҡорт батальондарын булдырыу дөрөҫ ҡарар булған, тине. Яугирҙәргә бик ҙур ярҙам күрһәтелә. – Мин бер осор ЛХР һәм ДХР-ҙа йәшәнем һәм Башҡортостандың нисек урындағы халыҡҡа ярҙам итеүен күрҙем. Һорауым шундай: ни өсөн республика исемле батальондар булдырырға ҡарар итте? – тип һораны ул. – Башҡорт батальондарына төбәк ярҙам төрҙәрен бүлеү мөмкинлеге бар. Шулай уҡ беҙҙең егеттәрҙең командованиеһының кем икәнлеген белеү мөһим ине. Өсөнсө сәбәп – бер-береңә ярҙам. Башҡортостандан мобилизацияланған егеттәрҙең беҙҙең полктарға эләгеүенә шатланам. Был логистика буйынса ла уңайлы, ярҙамды алып барыу еңел була. Көн һайын йөҙләп кеше мөрәжәғәт итә башланы, улар тап беҙҙең исемле батальондарға эләгергә теләй ине, шуға уларҙы булдырҙыҡ. Кемдең командир икәнен беләбеҙ, хәлдәрен белешеп торабыҙ. Ә уларҙың бергә булыуы бик яҡшы, – тине ул. Фото: Башҡортостан Башлығы матбуғат хеҙмәте.