Студенттарҙың проекттарына берәр миллион һум бирелә

Башҡортостан Рәсәйҙең университет стартаптары рейтингында проекттар һаны буйынса тәүге биш төбәк иҫәбенә инде. Бөтә Рәсәй технологик эшҡыуарлыҡ форумында иң яҡшы 1000 университет стартапы рейтингына йомғаҡ яһалды. Быйыл 2300 самаһы проект ҡатнашыуға заявка биргән. Рейтингка Башҡортостандан 76 проект ингән. - «Студенттар стартапы» программаһын ғәмәлгә ашырыу барышында Башҡортостан алдынғы төбәктәр иҫәбендә. Грант ярҙамын алған проекттар үҙҙәренең продукттарын баҙарға сығара. Хәтерегеҙгә төшөрәм, 2024 йылда «Студенттар стартапы» конкурсы дауам итәсәк. Рәсәйҙең юғары уҡыу йорттары студенттарының 2000 проектын һайлап алыу планлаштырыла, уларҙы тормошҡа ашырыу өсөн улар берәр миллион һум аласаҡ, - тип билдәләне Башҡортостандағы Инновацияларға булышлыҡ итеү үҙәге директоры Руслан Шәймөхәмәтов. Рейтингтың беренсе баҫҡысында - Айгөл Шадринаның стартабы (ӨДНТУ). Уның «Киләсәк образы» проекты ҡатнашыусылар араһында иң күп балл йыйған – 96,2 балл. Шулай уҡ университет стартаптары рейтингында уңышлы ҡатнашыусылар иҫәбендә: Тимур Солтанмәғмәтов - Өфө дәүләт нефть техник университеты, Шамил Зарипов - Өфө фән һәм технологиялар университеты, Антон Меркушев - Өфө дәүләт нефть техник университеты, Никита Лушников - Өфө фән һәм технологиялар университеты. Сығанаҡ һәм фото: pravitelstvorb.ru/news/22384/