Оҙаҡ йәшәүҙең сере ниҙә? 90 йәшкә еткән һәм унан да өлкән йәштәгеләр менән әңгәмәләшкәндән һуң бер нимәне аңланым. Беренсенән, уларҙың береһе лә үҙҙәрен сикләп йәшәмәгән, ни теләһәләр, шуны эшләгәндәр. Икенсенән, барыһы ла күңелдәрендә һәр саҡ ҡояш йөрөткән йәки үпкәләү-зарланыу уларға ят күренеш һаналған. Мәҫәлән, Балаҡатай районының Ҡарлыхан ауылында ғүмер йомғағын һүтеүсе 100 йәшен билдәләүсе Фәйрүзә Ҡлызбаеваны Әсәйҙәр көнө уңайынан Балаҡатай районы хакимиәте башлығы Мәсхүт Миңлеғәлин ҡотланы. – Атҡан һәр аяҙ таңға ҡыуанып йәшәйем, бигерәк тә бөгөнгө етеш тормошҡа шатлығымдың сиге юҡ, – тип һөйләй Фәйрүзә Ярулла ҡыҙы. – Бер нимәгә лә мохтажлыҡ кисермәйем. Рәхмәттән башҡа һүҙем юҡ. "Башҡортостан" республика гәзите хеҙмәткәрҙәре лә Фәйрүзә инәйҙе күркәм юбилейы менән ҡотлай, уға тыныс ҡартлыҡ теләй! Фото: Мәсхүт Миңлеғәлин.