Рәсәйҙең яңы биләмәләренә эш сәфәре һуңында Башҡортостан Башлығы Радий Хәбиров Ҡырым Республикаһы Башлығы Сергей Аксёнов менән осрашты. Көн тәртибендә – төбәк-ара хеҙмәттәшлекте нығытыу мәсьәләләре. Сергей Аксенов Башҡортостан етәкселегенә һәм шәхсән Радий Хәбировҡа Ҡырым халҡына ярҙам күрһәткәне өсөн рәхмәт белдерҙе. – Осрашыуҙарыбыҙға һәр саҡ шатмын, сөнки улар төбәктәрҙе үҫтереүгә ыңғай динамика бирә. Башҡортостан етәкселеге ҡырымдарға 2014 йылда уҡ, Ҡырым яҙының тәүге көндәренән үк ярҙам итте, – тип билдәләне Сергей Аксенов. – Төрлө ҡатмарлы хәлдәрҙә лә бер-беребеҙгә таянырға мөмкин булыуын беләбеҙ. Әле бергәләп яңы төбәктәргә һәм махсус хәрби операцияла ҡатнашыусы яугирҙәребеҙгә ярҙам итәбеҙ. Радий Хәбиров үҙ сиратында 2019 йылда Сибай балаларын урындағы карьерҙа төтөн сығыуға бәйле ҡатмарлы экологик хәл осоронда Ҡырым һауыҡтырыу йорттары ял итеүгә ҡабул иткәне өсөн Сергей Аксеновҡа рәхмәт белдерҙе. Башҡортостан Башлығы шулай уҡ “Башҡортостанда оҙон ғүмер. Туризм” проекты сиктәрендә пенсионерҙарҙы Ҡырымға ял итергә ебәреү буйынса хеҙмәттәшлек башларға тәҡдим итте. – Республика бюджеты иҫәбенә ветерандарыбыҙҙың хеҙмәте өсөн хөрмәт билдәһе сифатында уларға туристик юлламаларҙы субсидиялайбыҙ. Киләһе йылдан Ҡырымға сәфәрҙәр ойоштора башларға теләйбеҙ, – тине Радий Хәбиров. Сергей Аксёнов был башланғысты хупланы. Осрашыуҙа шулай уҡ Башҡортостан көстәре менән Евпаториялағы “Юбилей” балалар шифаханаһын төҙөү мөмкинлектәрен тикшерҙеләр. Проект яңы эш урындары булдырыу һәм республика балаларына Ҡырымда ял итеү мөмкинлеге бирәсәк. Хәтерегеҙгә төшөрәбеҙ, был шифахананы Башҡортостанға бушлай 2017 йылда бирҙеләр. Тәүҙә унда капиталь ремонт яһарға һәм биләмәне төҙөкләндерергә йыйыналар ине. Тик тикшереү һөҙөмтәһендә йоҡо корпустарының авария хәлендә булыуы асыҡлана һәм уларҙы емерергә кәрәк. Шуға күрә яңы проект эшләргә һәм балалар ата-әсәләре менән йыл әйләнеһенә ял итә алһын өсөн заманса шифахана комплексы төҙөргә ҡарар итәләр. 2023 йылда инженер селтәрҙәрен әҙерләгәндәр. Ә киләһе йылдан шифахананы төҙөй башларға планлаштыралар. Радий Хәбиров әйтеүенсә, яңы рекреация үҙәге Евпаторияның ысын биҙәгенә әйләнәсәк. Фото: Башҡортостан Башлығы сайты.