Երևանում ընթացող բռնցքամարտի պատանիների աշխարհի առաջնության մրցումային 4-րդ օրը հայ մարզիկները հաղթանակներ են տոնել, տեղեկանում ենք Հայաստանի բռնցքամարտի ֆեդերացիայի Facebook-յան էջից։
Պատանիների Եվրոպայի չեմպիոն, 50կգ քաշային Տիգրան Հովսեփյանը բոլոր առումներով գերազանցել է մրցակցին՝ Խորվաթիայի ներկայացուցիչ Մարիո Նակիչին։ Մեր մարզիկը բոլոր երեք ռաունդներում հաղթել է 5-0 հաշվով:
60 կգ քաշային կարգում իր երկրորդ հաղթանակն է տոնել Անդրանիկ Մարտիրոսյանը, որը մրցել է Լեհաստանը ներկայացնող Յան Յանուշեվսկու հետ։ Հայ բռնցքամարտիկը ամբողջ մենամարտի ընթացքում շոշափելի առավելություն է ունեցել՝ հաղթելով 5։0 հաշվով։
Օրվա ավարտը նույնպես հաղթական է եղել Հայաստանի համար․ 75 կգ քաշային կարգում հանդես եկող Ալբերտ Հարությունյանը Բելառուսի մարզիկին՝ Անատոլի Բարանովսկիին հաղթել է 3:2 հաշվով։
Բռնցքամարտի պատանիների աշխարհի առաջնությունը մեկնարկել է նոյեմբերի 24-ին, կավարտվի դեկտեմբերի 4-ին։
Առաջնությունը Հայաստանը ներկայացնում են 16 բռնցքամարտիկներ՝ Առնո Դարչինյանը (46 կգ), Վաղարշակ Քեյանը (48 կգ), Տիգրան Հովսեփյանը (50 կգ), Արեն Խառատյանը (52 կգ), Վահագն Գալստյանը (54 կգ), Տիգրան Մակիչյանը (57 կգ), Անդրանիկ Մարտիրոսյանը (60 կգ), Ալիկ Կճոյանը (63 կգ), Արգիշտի Հակոբյանը (66 կգ), Սամվել Սիրամարգյանը (70 կգ), Ալբերտ Հարությունյանը (75 կգ), Հայկ Ղահրամանյանը (80 կգ) և Տիգրան Խաչատրյանը (+80 կգ) և աղջիկների պայքարում՝ 48 կգ քաշային Հեղինե Պետրոսյանը, 52 կգ քաշային Քրիստինե Թորոսյանը և 54 կգ քաշային Էլեն Պապյանը:
