Рәсәй һәм Беларусь Республикаһының алдынғы киң мәғлүмәт саралары мөхәррирҙәре һәм журналистары «Иртәнән һуң. Дүртенсе властың киләсәге. Донъя тенденциялары» тип аталған видеокүпер рәүешендә "Дүртенсе властың" киләсәге тураһында фекер алышты. Рәсәй һәм Беларусҡа ҡаршы мәғлүмәт һуғышы, ялған фейктарға ҡаршы тороу, материалдарҙың сифаты һәм уҡыусының иғтибары өсөн көрәш - Рәсәй һәм Белоруссияның киң мәғлүмәт саралары вәкилдәре өс сәғәт дауамында ошо һәм башҡа мәсьәләләр хаҡында һөйләште. Гранд-сессияның башында әлеге ваҡытта Мәскәүҙә ВДНХ-ла барған «Рәсәй» халыҡ-ара күргәҙмәһендәге Башҡортостан космолетынан тура эфир булды. Экспозиция ВДНХ-ға төшөрөлгән йыһан аппараты рәүешендәге футуристик стендта урынлаштырылған. Был стенд - иң юғары технологиялы стендтарҙың береһе. - Күңелһеҙ нимәне әйтәм: төбәктә гәзиттәр яйлап үлә. Бизнес күҙлегенән был отошло түгел. "Дүртенсе баҫма власть" киләсәге хаҡында һүҙ йөрөткәндә, ул өмөтһөҙ. Хәйер... Гәзиттәрҙе һаҡлап ҡалыуҙың бер ысулы бар. Бының өсөн ни бары интернетты һүндерергә кәрәк! Төбәктәрҙең "дүртенсе власының" киләсәге халыҡтың ҡыҙыҡһыныуҙарына яуап биреүенә бәйле буласаҡ. Сөнки төбәктәрҙә ниндәйҙер реклама бюджеттары шарттарында иҫән ҡалыу ауырыраҡ һәм ҡатмарлыраҡ, айырыуса хәҙерге хәлдә. Киң мәғлүмәт саралары кешеләр проблемалары тураһында күп яҙа башлағас та, урындағы халыҡҡа ла, федералдарға ла ҡыҙыҡлы булып китә. Төбәк киң мәғлүмәт сараларының киләсәге бик ябай: йә беҙ кешеләрҙең ҡыҙыҡһыныуҙарына яуап бирәбеҙ һәм ниндәйҙер проблемаларҙы хәл итәбеҙ, шул саҡта ҡыҙыҡлы буласаҡбыҙ һәм аҙ ғына булһа ла аҡса эшләй аласаҡбыҙ. Йә беҙ "дүртенсе власть" урынына "бишенсе аяҡ" булып торасаҡбыҙ, - тине "Инфоштаб" медиахолдингы етәксеһе Александр Алымов. Гранд-сессияға йомғаҡ яһап, сараны алып барыусы Сергей Коляда, сифатлы ҡыҙыҡлы продукт әҙерләгән баҫмаларға һәр ваҡыт ышанырҙар, һәм уларға онотолоу янамайҙыр, моғайын, тип билдәләне. Сығанаҡ: https://ibw-bashkortostan.com/news/16817/