Мәләүез районының Ергән ауылында йыл башынан алып ирекмәндәр бүлексәһе эшләй. Был эште ошо ауылда йәшәгән отставкалағы майор Азамат Рафиҡов ойоштора. Ул эшләүсе төркөмдәрҙе материал менән тәьмин итә, ҡорамалдар яһай, мәктәптә балалар менән селтәр үреү нескәлектәрен үҙләштерә, тип яҙа “Путь Октября” гәзите. Тәүҙә ирекмәндәр урта мәктәп бинаһында селтәр үрә, ә сентябрь айынан башлап күп функциялы ауыл клубында шөғөлләнә. Аҙнаһына ике тапҡыр билдәләнгән көн һәм сәғәттә оло йәштәгеләр клубҡа йыйыла. Ҡулдарының йылыһын һәм йөрәктәренең ҡайнарлығын һалып үргән селтәрҙәр егеттәребеҙҙе дошман утынан һаҡлаһын өсөн тырыша улар. Ярҙам итергә теләүселәр күп булғас, ҡырҡҡа яҡын кеше ике төркөмгә бүленеп эшләргә ҡарар итә. ”Сәләмәтлек” һәм “Йондоҙ” ирекмәндәренең эше яйға һалынған, тәртип тә, дисциплина ла бар. “Улар завод конвейерындағы кеүек эшләй, яуаплылыҡ көслө”, тиҙәр улар хаҡында. Махсус тәғәйенләнештәге разведчиктар отряды уларға рәхмәт тә белдергән. Гөлиә Шаһиғәлина фотолары.