“Әсәй”, “балам” тип өндәшер яҡындарың булыуы – сикһеҙ бәхет!

Әсә һәм бала. Улар бер бөтөн һәм айырылғыһыҙ. Ниндәй бөйөк исем! Ер йөҙөндә унан да ғәзизерәк, изгерәк зат юҡтыр! Донъяға килгән мәленән алып сабый ғәзиз кешеһенең йомшаҡ ҡулдарын һиҙеп, яғымлы ҡарашын тойоп йәшәй. Һәр көн ул бәләкәсенә күңел йылылығын, наҙын бүләк итә һәм оло тормош юлына сығарырға булышлыҡ итә. “Башҡортостан” гәзитенең “Бәйләнештә” төркөмөндә барған “Донъя йәмле әсәйҙәр менән!” тип исемләнгән конкурста ихлас ҡатнашҡан Флүзә Хәсәнова – йәш әсәй. Ире Айҙар менән Ҡырмыҫҡалы районының Ҡырмыҫҡалы ауылында йәшәйҙәр. Улдары Эльвирға – ете йәш. Ҡыҙҙары Элинаға – биш йәш ярым. Ғаилә башлығы Себер тарафтарында эшләй. Ә Флүзә, үҙ һөнәре менән эш килеп сыҡмағас, әлегә магазинда эшләй. Йәш ғаилә балалары менән сәйәхәт итергә тырыша. Бәләкәстәренә республикабыҙҙың мөғжизәгә тиң тәбиғәт мөйөштәрен күрһәтәләр, спортҡа ылыҡтыралар. Флүзәнең әсәһе Эльвера Нафиҡова - Ҡырмыҫҡалы ауылындағы 1-се балалар басаһында тәрбиәсе. Ул ҡыҙының һәм уның ғаиләһенең бәхетле йәшәүен теләй. Әсә өсөн бала Ер йөҙөндә бер нәмә менән дә тиң була алмаҫлыҡ йөрәк майымы, әллә йөрәк пәрҙәһеме? Был һорауға яуапты һис ҡасан табып булмаҫ кеүек. Йылдар үтеп, сәстәргә сал төшһә лә, әсәйебеҙгә беҙ һәр ваҡыт бала булып ҡалабыҙ. Бына ошо һорауҙарға яуаптарҙы Эльвира Нафиҡова үҙенең шиғри юлдарында табырға ынтыла. Ул республикабыҙҙағы барлыҡ әсәйҙәргә, шул иҫәптән ҡыҙына, ейән-ейәнсәренә бағышлап шиғри юлдар яҙып ебәргән. Уларҙы һеҙҙең иғтибарға тәҡдим итәбеҙ. Әнкәй Бала саҡтан, әнкәй, тинем, Әнкәй – бөйөк исем ул. Яратҡан да күңел йылыһын биреп, Үҫтереп аяҡҡа баҫтырған. Әнкәй ул! Минең әнкәй ул! Беҙ үҫкәндә ни рәхәт күргән? Күпме үткән башынан ҡайғы-хәсрәт, Ә ул ғорур атлап, Һаман алға барған, Күҙ алдымда уның йәрәхәте. “Әнкәй”, тинек өс бер туған, Тупылдашып үҫеп килгәндә, Ҡара болот осто баш осонан. Ҡояш нуры ҡасты алыҫ-йыраҡҡа. Гүзәл исем Нисә милләт, нисә телдә Әйткән был матур һүҙҙәр. Яғымлы ла, гүзәлдәрҙән дә гүзәл Әсәй, әнкәй, әни, инәй! Иҫәпләп бөтөп булмай. Күкрәк һөтөн имеҙгән, Ғүмер биргән. Йөрәк йылыһын бүлеп Үҫтергән! Тормош юлына баҫырға Ярҙам иткән Әсәй, әнкәй, әни, инәй! Күпме ғазап кисерелгән Һикәлтәле тормошта. Ыңғай ғына булмаған бит, Яҙмыштан юҡ уҙмыш та. Хәҙер инде үҙебеҙ әсәй. Бала тиеп өҙөлөп Йәшәйбеҙ беҙ етешлектә, Барыһына шөкөр тип, Ейәндәр үҫтерешәбеҙ, Ҡулдан килгәнсә ярҙам. Тик илебеҙ тыныс булһын, Мең рәхмәт һиңә, Аллам! Уйҙар, уйҙар... Баштарымда – меңләгән уйҙар: Ниҙәр булды, тип аптырап торамын, Әнкәй, ҡайҙа һуң һин? Һин ҡайҙа? Тормош ауыр һәм ҡатмарлы ла, Ул бирешмәй алға атланы. Йөрәген һурып алғандай, Эсе бошто ялған һүҙҙәрҙән. Түҙеп йәшәй алды, ауырлыҡты гиҙеп, Атай-әсәй бар өҫтөнән Өс бала етим ҡалды түгелме? Балалар күңеле китек, Өйҙөң нуры ҡасҡан, Әнкәй булмағас берүк. Әнкәйҙәрҙең ҡәҙерен белеп Йәшәйек был яҡты тормошта. Үткән ғүмер үткән инде хәҙер, Алға ҡарап, дуҫым, һин атла! Ҡыҙыма Ҡыҙым тип яна йөрәгем, Балам, тип өҙөлә үҙәгем. Ҡыҙым булған ерҙә һәр саҡ Нурҙар һибелә һәм йөҙө алсаҡ. Минең терәгем, һин, бәхетем. Һәр саҡ булһын күңелле кәйефең. Осоп килә ҡаршыма Ярҙам ҡулдарын һуҙып, Ярты һүҙҙән аңлап тора, Әсәй, тиеп өҙөлөп тора. Балалар – беҙҙең терәк. Һәм минән ошо теләк: Бәхетле, ғүмерле булып, Йәшәһендәр матур тормошта. Тормошомдың матурлығы Һеҙҙән генә тора бит. Балаларым, яҡындарым, Һеҙ тип йәшәйем. Һеҙ тип тибә йөрәгем. Таңдар ата рәхмәт, тимен, Һәр бер иртә көндәргә. Балаларым, ейәндәрем Һөйөндөрә, шатландыра. Дәртләндерә күңелдәрҙе. Һеҙ – минең йөрәгем түрендә. Донъя матур,тормош алға бара. Тыныслыҡ ҡына бир Хоҙай илемә. Һәр кем бер генә килә ауаз һалып, Йәшәйексе әле ҡәҙер-хөрмәттә. Ейәндәремә Баламдың балаһы - Күҙемден ҡараһы. Балдан, шәкәрҙән дә татлы Баламдың балаһы. Күрмәй торһам, һағынам, Бәхетемә шулар бар. Изгелектә, бәхеттә Йәшәһендәр балалар. Шатлығым минең – улар, Күңелемә – тыныслыҡ. Миһырбанлы булһындар, Ғүмерҙәре бәхетле булып, Аҡыллы булып үҫһендәр. Һәр кемдең балаһы ла Ҡәҙерле әсәһенә. Имен-һаулыҡ теләйем Мин дә ейәндәремә. Йөрәк түрендә улар Һәр бер һулыштарына ҡыуанам. Шатланам да,һөйөнәм дә, Мең рәхмәт Хоҙайым тип. Бына шундай матур йәш ғаилә йәшәй Ҡырмыҫҡалы ауылында. Гәзитебеҙ төркөмөндә ихлас ҡатнашҡан Флүзә Хәсәнова өсөн тауыш бирәйек, дуҫтар, ихлас теләктәребеҙҙе юллап комментарийҙарыбыҙҙы яҙайыҡ, лайктар ҡуяйыҡ. Фотолар Флүзә Хәсәнованың шәхси архивынан.