Хәйбулла районында йәшәгән Собханғоловтар ғаиләһе күптәргә өлгө булырлыҡ. “Ун йыл донъя көтөү осоронда улар ҙур йорт һалып инде, баҡса үҫтерәләр, өс бала тәрбиәләйҙәр, иң мөһиме, уларҙың ғаиләһендә тыныслыҡ, мөхәббәт һәм хөрмәт йәшәй”, тип яҙа “Хайбуллинский вестник”. Марсель Миңләхмәт улы – хәстәрлекле атай һәм уңған ғаилә башлығы. Аҡъярҙа Балалар ижады йорто директоры булып эшләй. Бәләкәйҙән бейеү сәнғәте менән мауыҡҡан егет хәҙер үҙе йәш артистарҙы бейергә өйрәтә һәм “Сиҙәм” халыҡ ансамбленә етәкселек итә. Зинира Дамир ҡыҙы әле декрет ялында. Уңған хужабикә, балаларын яратып үҫтергән әсә булыу өҫтөнә буш ваҡытында социаль селтәрҙә блог алып бара.Өлкән улдары быйыл беренсе класҡа уҡырға төшкән. Бокс түңәрәгенә йөрөй, атаһы кеүек бейергә ярата. Дүрт йәшлек Таһирға тиклем бейеү сәнғәтенә ғашиҡ, ул да Юлдаш Мортазин етәкселегендәге түңәрәктә шөғөлләнә. Ике йәшлек Мәликә әлегә балалар баҡсаһына йөрөй. Ата-әсә буш ваҡыттарын бергә үткәрергә, республика буйлап сәйәхәт итергә, иҫтәлекле урындарҙа булырға ярата. Йәш ғаиләгә һаулыҡ, уңыштар теләйбеҙ, йәшәү дәртен һүндермәй, тирә- яғығыҙға нур сәсеп йәшәгеҙ! Фото: Хәйбулла районының ”Ғаилә”хеҙмәте.