Ауырлыҡтарҙы бергәләп еңеп сығасаҡбыҙ

Өфөлә, Хөсәйен Әхмәтов исемендәге Башҡорт дәүләт филармонияһында, “Белореттар – беҙ бергә” яҡташтар осрашыуы үтте. Сара махсус хәрби операцияла ҡатнашҡан яугирҙәргә гуманитар ярҙам йыйыу маҡсатында ойошторолдо. Уны ойоштороуҙа Башҡортостандың Мәҙәниәт министрлығы, Белорет районы хакимиәте, Хөсәйен Әхмәтов исемендәге Башҡорт дәүләт филармонияһы һәм "Артыш" яҡташтар ойошмаһы әүҙем ҡатнашты. Осрашыуға килгән Белорет районы етәкселеге һәм “Артыш” яҡташтар ойошмаһы ағзалары Иҙел башынан сыҡҡан билдәле шәхестәр, СССР-ҙың халыҡ артистары – Заһир Исмәғилев һәм Арыҫлан Мөбәрәков һәйкәлдәренә сәскәләр һалды. Хөсәйен Әхмәтов исемендәге Башҡорт дәүләт филармонияһы фойеһы Белорет районынан килгән эшҡыуарҙарҙың һәм халыҡ кәсебе оҫталарының әйберҙәре, шулай уҡ район мәҙәниәт бүлеге ойошторған һәм Иҙел башы тарихын сағылдырған ҙур күргәҙмә яҡташтарға, ҡунаҡтарға оҡшаны. Улар тыуған ерҙәрендә етештерелгән ризыҡтарҙан ауыҙ итте, һатып алды. Белорет тарих-тыуған яҡты өйрәнеү музейы махсус хәрби операция барышында һәләк булған Белорет геройҙары тураһында материалдар менән “Батырлыҡ йөҙҙәре” күргәҙмәһен тәҡдим итте. Ә Дмитрий Николаев 25 йыл дауамында йыйған хәрби кейемдәр коллекцияһын күрһәтергә алып килгән. Белорет картиналар галереяһы “Белорет һәм уның тирә-яғы рәссамдар күҙлегенән” күргәҙмәһен биҙәне. Йөйәк ауылы оҫтаһы Гөлсирә Салауатова үҙенең музей коллекцияһынан милли башҡорт стилендәге уйынсыҡтар, биҙәүестәр, кейемдәр күрһәтте. Үҙәкләштерелгән китапхана системаһы Белорет районының тарихы һәм мәҙәниәте, шулай уҡ махсус хәрби операцияла ҡатнашҡан яҡташтарыма ярҙам тураһында мәғлүмәт менән “Минең атайсалым” күргәҙмәһен ойошторҙо. “Горница искусниц” ижади берекмәһенең Бағаналы ҡурсаҡтар коллекцияһы Белоречье оҫталарының таланттары тураһында мәғлүмәт бирҙе. Ҡунаҡтарҙы “Еңгәләр” халыҡ фольклор ансамбле ҡаршы алып, осрашыуҙа ҡатнашыусыларға дәртле йырҙары һәм матур бейеүҙәре менән яҡшы кәйеф бүләк итте. – Беҙ ҙә, Белорет районы муниципаль районы мәғариф идаралығы исеменән, был сараға ҡушылдыҡ. Район һәм ҡала мәктәптәре махсус хәрби операция башланғандан алып, “Өй йылыһын бүләк итәм", ”Һалдат хаттары “, “Талисмандар”, “Блиндаж шәмдәре” кеүек төрлө акцияларҙа әүҙем ҡатнаша. Шулай уҡ күңел йылыһын ҡушып, тыуған яҡ үләндәрен дә һалдыҡ. Был сарала ҡатнашыусылар беҙҙең өҫтәл янына килеп, үҙҙәренең йылы теләктәрен, сәләмдәрен хат аша еткерҙеләр. Һалдаттар белһендәр: беҙ уларҙы онотмайбыҙ, иҫән-һау әйләнеп ҡайтыуҙарын теләйбеҙ! – тине Белорет лицей-интернат уҡытыусылары. Белорет районы бөгөн йәш белгестәргә ҡытлыҡ кисерә. Шуға ла был сара сиктәрендә район етәкселеге менән баш ҡаланың юғары һәм урта белем биреү уҡыу йортонда белем алған яҡташ студенттар менән осрашыу ҙа ойошторолдо. Сараның рәсми өлөшөндә Белорет район хакимиәте башлығы Андрей Иванюта, “Ватанды һаҡлаусылар” дәүләт фондының филиалы етәксеһе, Дәүләт Йыйылышы – Ҡоролтай депутаты, Бөтә Рәсәй “Рәсәй халыҡтары ассамблеяһы” ижтимағи-дәүләт ойошмаһының төбәк бүлексәһе рәйесе Гөлнур Ҡолһарина, Бөтә донъя башҡоттары ҡоролтайы Башҡарма комитеты рәйесе, Дәүләт Йыйылышы – Ҡоролтай депутаты Юлдаш Йосопов, "Артыш" яҡташтар ойошмаһы етәксеһе Рәйес Исмәғилев сығыш яһаны, иң әүҙем яҡташтарыбыҙға маҡтау ҡағыҙҙары, рәхмәт хаттары тапшырылды. Белореттан килгән һәүәҫкән артистар, коллективтар, шулай уҡ баш ҡалала йәшәгән сәнғәт әһелдәре һәм сара ҡунаҡтары бай концерт бүләк итте. Концертҡа билеттар һатыуҙан килгән аҡса махсус хәрби операцияла ҡатнашыусы һалдаттарыбыҙға махсус ярҙам иҫәбенә күсерелде, шулай уҡ “Артыш” яҡташтар ойошмаһының ойоштороу комитеты аҡса йыйыуҙы ойошторҙо. Был сарала районда белореттар әүҙем ҡатнашты. Фото: vk.com/beloradm. Рәмилә МУСИНА фотолары.