Башҡортостан Республикаһы Хөкүмәте Премьер-министры урынбаҫары Алан Марзаев профилле ведомстволар етәкселәре һәм подряд ойошмалары вәкилдәре менән берлектә Өфөләге вуз-ара кампуста барған төҙөлөш эштәре буйынса кәңәшмә үткәрҙе. Комиссия биналарҙың әҙерлеген тикшерҙе, артабан вице-премьер проектлаусылар һәм махсус ведомстволар белгестәре менән видеоконференция алымында кәңәшмә үткәрҙе. Һөйләшеү темаларының береһе булараҡ биналарҙың фәнни-технологик ҡорамалдар урынлаштырыуға әҙерлек мәсьәләһе ҡаралды. Өфө фән һәм технологиялар университеты, Өфө дәүләт нефть техник университеты һәм Башҡорт дәүләт медицина университеты ғилми лабораторияларын үҙҙәренә бүленгән ҡаттарға күсерергә әҙер. Иҫегеҙгә төшөрәбеҙ: IQ-паркта 28 вуз-ара лаборатория эшләйәсәк, ә икенсе сиратты сафҡа индереү менән тағы ла 20 лаборатория өҫтәләсәк. 15 ҡатлы башня-бина файҙаланыуға әҙер тиерлек, ә ете ҡатлы IQ-паркта биҙәү эштәре тамамлана. Көн һайын төҙөлөштә өс сменала 600-ҙән ашыу кеше эшләй. Эштәрҙе генераль подрядсы «Уралком» компанияһы менән килешеүгә ярашлы, концессионер «Кампус» компанияһы алып бара. БР төҙөлөш һәм архитектура министры урынбаҫары Сыңғыҙ Хәсәнов, икенсе сиратты төҙөү өсөн һүтелергә тейешле биналарҙы һәм ҡоролмаларҙы һүтеү тамамланды, тип хәбәр итте. Генераль подрядсы булған «Эталон» компанияһы әҙерлек эштәрен башлаған. Хәтерегеҙгә төшөрәбеҙ, Рәсәй Президенты Владимир Путин 2030 йылға 25 заманса кампустан торған селтәр төҙөргә ҡушты, уларҙың 17-һе әлеге ваҡытта тормошҡа ашырылыу кимәлендә. Быға Рәсәй Мәғариф һәм фән министрлығы тормошҡа ашырған «Фән һәм университеттар» милли проекты ярҙамында өлгәшелә. Сығанаҡ: pravitelstvorb.ru