Быйыл Яңы йыл байрамдары нисек үтер?

4 декабрҙә Башҡортостан Башлығы Радий Хәбиров рәйеслегендә үткән аҙналыҡ оператив кәңәшмәлә Яңы йыл байрамдарына әҙерлек тикшерелде. Көн тәртибендә - яңы йыл ҡаласыҡтарын төҙөкләндереү һәм хәүефһеҙлек талаптарын иҫәпкә алып күмәк мәҙәни саралар үткәреү мәсьәләләре. Республиканың торлаҡ-коммуналь хужалыҡ министры Ирина Голованова муниципалитеттарҙа боҙ һәм байрам майҙансыҡтарын төҙөү 20 декабргә тамамланасағын хәбәр итте. Бөтәһе 1 012 яңы йыл ҡаласығы йыһазландырыла, 2 103 шыршы һәм 2 меңдән ашыу арт-объект ҡуйыла. Өфөлә 149 шыршы, 19 яңы йыл ҡаласығы биҙәлә. – 9 декабргә тиклем тораҡ пункттарҙа биналарҙы, инеү урындарын, урамдарҙы һәм йәмәғәт киңлектәрен, парктарҙы һәм скверҙарҙы архитектур яҡтыртыуҙы монтажлау тамамланасаҡ, – тип хәбәр итте Ирина Голованова. – Ә 23 декабргә бөтә муниципалитеттар ҙа Яңы йыл ҡаласыҡтарын асыуға әҙерләргә һәм Дәүләт техник күҙәтеүе сертификатлауын талап иткән ҡышҡы тауҙарҙы техник яҡтан баһаларға тейеш. Радий Хәбиров муниципалитет башлыҡтарына яңы йыл байрамдарында йәмәғәт хәүефһеҙлеге мәсьәләләренә етди иғтибар бүлергә ҡушты. Яҡын арала республика Хөкүмәтендә хоҡуҡ һаҡлау органдары һәм оператив хеҙмәттәр вәкилдәре ҡатнашлығында ошо тема буйынса кәңәшмә үткәреләсәк. Мәҙәниәт министры Әминә Шафиҡова Яңы йылға республика халҡы өсөн 28 мең күмәк сара ойошторолоуы, уларҙа 2 миллион самаһы ҡунаҡтың килеүе хаҡында һөйләне. Ваҡиғалар тураһында мәғлүмәтте ғәҙәттәге “Яңы йыл календарында” белергә мөмкин. Уны 25 декабргә ”Башҡортостандың мәҙәни донъяһы” интернет-порталына урынлаштыралар. – Дәүләт ҡурсаҡ театрының яңыртылған бинаһын асыу Яңы йылға ҙур бүләк буласаҡ, - тине Әминә Шафиҡова. - Ул 23 декабрҙә асыла. Байрам репертуарында - "Щелкунчик", "Уйынсыҡтарҙың тылсымлы мажараһы", "Яңы йыл нимә ул?" спектаклдәре. Муниципаль иртәлектәр 24-25 декабргә билдәләнгән, ә республика Яңы йыл шыршыһы 27 декабрҙә үтә. 4 ғинуарҙан 11-енә тиклем республика райондарында Рәсәй Президенты Владимир Путин иғлан иткән Ғаилә йылына арналған “Яңы йыл ғаилә уйындары-2024” ойошторола. Уларҙа 1-4-се класс уҡыусылары булған 45 мең самаһы ғаилә ҡатнаша. Бынан тыш, төбәктең Мәғариф һәм фән министрлығы уҡыусылар өсөн конкурстар, викториналар, күргәҙмәләр, флешмобтар, интерактив яңы йыл тамашалары, квестар әҙерләгән. Йыл һайын яңы йыл каникулдарында республикала бик күп ҡыҙыҡлы һәм мауыҡтырғыс саралар ойошторола, тип һыҙыҡ өҫтөнә алды Башҡортостан Башлығы. Радий Хәбиров республиканың Мәҙәниәт министрлығына хәрби бурысын үтәгәндә һәләк булғандарҙың етем балаларына, махсус хәрби операцияла ҡатнашыусыларҙың ғаиләләренә ҙур иғтибар бүлергә ҡушты, улар байрам сараларын бушлай ҡарай алырға тейеш. – Шулай уҡ махсус хәрби операцияла ҡатнашыусыларҙың балаларына Яңы йыл бүләктәре тапшырырға ҡарар иттек, – тине Радий Хәбиров. – Муниципалитет башлыҡтарынан был мәсьәләне формаль хәл итмәүҙәрен һорайым. Бүләкте ҡыҙыҡлы һәм үҙенсәлекле итеп тапшырырға кәрәк. Был ғәҙел буласаҡ, сөнки был балаларҙың аталары хәрби хәрәкәттәр зонаһында. Яңы йылға бүләктәрҙе Башҡортостандың ишле ғаиләләренән 17,5 меңдән ашыу бала аласаҡ. – Йыл һайын аҙ тәьмин ителгән биш һәм унан күберәк бала тәрбиәләнгән ғаиләләрҙәге 14 йәшлек балаларға бүләктәр әҙерләйбеҙ. Уларҙы 15 декабрҙән һуң тапшыра башлайҙар, – тип билдәләне республиканың ғаилә, хеҙмәт һәм халыҡты социаль яҡлау министры Ленара Иванова. – Бынан тыш, етем һәм опекунлыҡҡа алған ғаиләләрҙә тәрбиәләнгән балалар бүләктәр аласаҡ. Шулай уҡ өйҙә тәрбиәләү буйынса бушлай хеҙмәттәр алған МХО-ла ҡатнашыусыларҙың 895 оло йәштәге ата-әсәһен дә Яңы йыл ҡотлауҙары менән ҡыуандырабыҙ. Һаулыҡ мөмкинлектәре сикле һәм инвалид балалар өсөн бүләктәр тапшырыу менән Яңы йыл тамашаларын ойоштороу буйынса ҙур эш башҡарылды. Ә 2024 йылдың 12 ғинуарында йолаға әүерелгән "Аксаков шыршыһы" бөтә республиканан 250 "үҙенсәлекле" баланы, шулай уҡ махсус хәрби операцияла ҡатнашыусыларҙың балаларын йыя. Башҡортостан Башлығы бер "үҙенсәлекле" бала ла Яңы йыл байрамдарында иғтибарһыҙ ҡалмаһын өсөн һәр муниципалитетта ошондай шыршылар уҙғарырға ҡушты. Фото: Башҡортостан Башлығы сайты.