Қазақстанда 5 жылда 3 300 жалғызбасты ана уақытында әлеуметтік көмек алды. Олардың сәбилері балалар үйінің табалдырығын аттаудан аман қалды. Қазір дағдарыс орталықтарында баласымен жалғыз қалып, тағдыр тәлкегіне ұшыраған әйелдер пана тапқан.
2017 жылдың қаңтарындағы мәлімет бойынша, елімізде 140 ұйымда некесіз туылған 7236 бала тіркелген. Олардың 3460-ы балалар үйінде, 1011-і мектеп интернаттарда, 88-і отбасы үлгісіндегі балалар үйінде, 833-і отбасы үлгісіндегі балалар ауылында, 186-сы жеткіншектер үйінде, 173-і жетім балалар үйінде. Бұл – Білім және ғылым министрлігінің берген ақпараты. Сондай-ақ, құрсағына шарана біткеннен туыстары тұрмақ, ата-анасы теріс айналғандар, қысастық пен қорлыққа шыдамағандар "Аналар үйі" дағдарыс орталығынан пана тауып отыр.
Тірі жетімдер санын азайту, өмірдің қысылтаяң кезеңіне тап болған жас және жалғызбасты аналарға көмектесу мақсатында ұсынылған жоба нәтижесін берді. Еліміздің осындай баспаналарға зәрулігі болар, алғашқы «Аналар үйі» бір айда толды. Бұл жоба 2015 жылы еліміз бойынша тастанды балалар санын 51 пайызға қысқартса, 2016 жылы 70 пайызға төмендеткен екен. Бүгінде елімізде 26 «Аналар үйі» бар.
Қыздар мұнда бір жарым жыл бойы тегін тұра алады. Бұл үйде аналар мен балаларға қажеттінің бәрі бар. Баланың ойыншығынан бастап, кір жуғыш мәшине, тоңазытқыш, теледидар секілді тұрмыстық жабдықтармен қамтылған. Ал жалғызбасты аналар мемлекеттен берілетін жәрдемақыларын ұстамай, жинап, қор қылып сақтап қоя алады. Сондай-ақ, республика бойынша «Аналар үйі» жалғызбасты аналарды арнайы курстардан өткізіп, олардың сертификат алу мүмкіндіктерін ұйымдастырып жатыр. Мысалы, кәсіби білімі жоқ жас аналар шаштаразшылар курсынан өтіп, сертификаттарын алған соң, кез-келген сұлулық салонында жұмыс істей алады.
«Аналар үйінде» отыз жасқа дейінгі қыздар бір жасқа толмаған баласымен алты ай, балалар үйінің түлектері бір-бір жарым жыл тұра алады. Ал кәмелетке толмағандарға 18 жасқа дейін тұруына болады. Үйлестірушіден басқа екі шаруашылық меңгерушісі, медбике, психолог, көлік жүргізушісі штаттық жұмыс атқарады.
"Философия және саясаттану" факультетінің,"әлеуметтік жұмыс" мамандығының 1-курс магистранты: Мырзараимова А.
Жетекші: Авсыдыкова Қ.А.