Бөгөн Өфөлә республика Башлығы Радий Хәбиров Башҡортостандың сәнәғәт хеҙмәткәре көнө айҡанлы үткәрелгән тантаналы сарала ҡатнашты һәм дәүләт наградаларын тапшырҙы. Сәнәғәт комплексы һәм юл тармағының 64 белгесенә һөнәри ҡаҙаныштары өсөн ордендар, миҙалдар, Почет грамоталары, маҡтаулы исемдәр һәм рәхмәт ҡағыҙҙары бирелде. Бүләкләү тантанаһында тәүге тапҡыр «Башҡортостан Республикаһының атҡаҙанған художестволы халыҡ кәсептәре оҫтаһы» тигән маҡтаулы исем бирелде. Радий Хәбиров исемде булдырыу тураһындағы ҡарарға 2023 йылдың авгусында ҡул ҡуйғайны. Был исем халыҡ кәсептәрен һаҡлауға, тергеҙеүгә һәм үҫтереүгә ҙур өлөш индергән оҫталарға бирелә. “Бөгөн беҙ Башҡортостандың сәнәғәт тармағында эшләгән барлыҡ хеҙмәткәрҙәрҙе һөнәри байрамдары менән ҡотлайбыҙ. Республиканың сәнәғәт комплексы бихисап кешене берләштерә. Һеҙ – ҡеүәтле көс, иҡтисадыбыҙҙың ышаныслы нигеҙе. Яуаплы хеҙмәтегеҙ өсөн рәхмәт. Ҡатмарлы шарттарға ҡарамаҫтан, беҙҙең тармаҡ үҫә, быйыл етештереү күләме 6,7 процентҡа артҡан. Башҡортостан предприятиелары продукцияһы Рәсәй һәм донъя баҙарҙарында лайыҡлы урын биләй. Республиканың сәнәғәт кластерҙары, алдынғы иҡтисади үҫеш биләмәләре, сәнәғәт-технология парктары уңышлы эшләй. Ике йыл рәттән “Алға” махсус иҡтисади зонаһы илдә иң йылдам үҫешеүсе зона тип танылды. Ғөмүмән, өсөнсө йыл рәттән ил кимәлендә сәнәғәт сәйәсәтен тормошҡа ашырыуҙың һөҙөмтәлелеге буйынса тәүге өс төбәк иҫәбенә индек. Компанияларыбыҙға етештереү үҫешен тәьмин иткәне, күләмле проекттарҙы тормошҡа ашырғаны, иҡтисадыбыҙҙың драйверы булып сығыш яһағаны өсөн рәхмәт белдерәбеҙ. Яңы иҡтисади ысынбарлыҡта беҙ үҫештең яңы нөктәләрен билдәләйбеҙ. Оборона сәнәғәте предприятиеларының өҙлөкһөҙ эшләүен, импортты алмаштырыуҙы, инновацион эшләнмәләр индереүҙе тәьмин итеү буйынса махсус хәрби операция шарттарында проблемаларҙы хәл итәбеҙ, - тине Радий Хәбиров ҡотлауҙарға күсер алдынан. Салауат Юлаев ордены менән “Полекс Урал” компанияһының генераль директоры Рефат Абдурахман улы Абдурашитов бүләкләнде. Уның етәкселегендә пластик һауыттар етештереү күләме һиҙелерлек арта. Бөгөн “Полекс Урал” пластик һауыттар етештереү буйынса Бөтә Рәсәй баҙарының яҡынса дүрттән бер өлөшөн биләй. Республика Почет грамотаһы Өфө витаминдар заводының техник директоры Олег Николаевич Стоговҡа тапшырылды. Былтыр уның ҡатнашлығында гемофилияны дауалауҙа ҡулланылған мөһим препарат етештереү буйынса оҫтахана төҙөлгән. «Башҡортостан Республикаһының атҡаҙанған шахтеры» тигән маҡтаулы исем Бүребай тау-байыҡтырыу заводының электровоз водителе Сергей Александрович Кондратьевҡа бирелде. Сергей Александрович — бригаданың иң тәжрибәле электровоз водителе, мәғдәнде иң алыҫ йөҙҙәрҙән ташый. «Башҡортостан Республикаһының атҡаҙанған энергетигы» тигән маҡтаулы исем Ҡарман ГРЭС-ы директоры Юрий Борисович Ковалевҡа бирелде. Уның етәкселегендә заводтың электр станцияларына тәрән модернизациялау үткәрелә, был ҡеүәттәрҙе арттырырға һәм электр энергияһы етештереү өсөн яғыулыҡ сығымдарын кәметергә мөмкинлек бирәсәк. Тантаналы сарала юл тармағы хеҙмәткәрҙәрен, иң тәүҙә, "Башкиравтодор" предприятиеһын бүләкләнеләр. Йөҙҙәрсә километр юлдар, күперҙәр төҙөлөп йүнәтелгән, юл хәрәкәте хәүефһеҙлеген яҡшыртыу — быларҙың барыһы ла уларҙың эше һөҙөмтәһе. Бүләкләнгән хеҙмәткәрҙәр араһында — Ҡырмыҫҡалы ДРСУ-һының йөк машинаһы краны водителе, Баҡыев Разит Сәғит улы бар, ул тармаҡта 30 йыл эшләй. Өфөлә Ағиҙел йылғаһы аша, Өфө-Инйәр-Белорет юлы һәм башҡа бик күп мөһим объекттарҙа күпер төҙөүҙә ҡатнаша. Юл төҙөлөшөндә 20 йыл самаһы Бүздәк ДРСУ-һы водителе Рифат Камилович Ҡәйүмов эшләй. Хеҙмәттәштәре талапсан, үҙ эшенең оҫтаһы тип баһалай. Рифат Камилович — йәштәрҙең тәжрибәле остазы. Фотолар Башҡортостан Хөкүмәте сайтынан алынды.