Иглин районы хакимиәтендә төбәк башҡарма власть органдары һәм район хакимиәте вәкилдәре ҡатнашлығында сираттағы эшҡыуарлыҡ сәғәте үтте. Бизнес менән бындай аралашыу форматы “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектын тормошҡа ашырыу сиктәрендә үткәрелә. Үҙ проектын тикшереүгә шәхси эшҡыуар О.Н. Седелков вәкиле Евгений Седелков тәҡдим итте. Эшҡыуар сыр ҡайнатыу менән шөғөлләнә, ҡул менән шоколад эшләй. Ул кәзәләрҙе үрсетеү, уларҙы ҡарау өсөн биналар төҙөү, шулай уҡ туристар өсөн глэмпинг ҡороу өсөн Кальтовка ауылы янында ер участкаһы биреүҙәрен һораны. Эшҡыуарҙы хупланылар, бәләкәй эшҡыуарлыҡ субъекттарын субсидиялау мәсьәләһе буйынса консультация бирҙеләр һәм проектты эшләп бөтөп, аныҡ концепция тәҡдим итергә кәңәш бирҙеләр. Мәсет төҙөү һәм Иглин ауылының Звездный биҫтәһендә ер участкаһы бүлеү мәсьәләһе менән Илдар Сәрүәриев, Заҡуан Әхмәҙиев мөрәжәғәт итте. Райондың баш архитекторына төҙөлөшкә ер бүлеү өсөн участка бүлеүҙе ҡарарға ҡушылды. Шәхси эшҡыуар Тафиҡ Ҡабаев Октябрьский ауылында ит тоҡомло һыйыр малы үрсетеү буйынса проект тәҡдим итте. Эшҡыуарлыҡ сәғәтендә ҡатнашыусыларға инвестиция проектына дәүләт ярҙамы күрһәтеү варианттары буйынса тәҡдимдәр әҙерләү бурысы йөкмәтелде. "Бәләкәй йәки урта бизнеста тәүге аҙымдар яһаусыларға дәүләт ярҙам итергә: һалым льготалары йәки кредиттар буйынса гарантия бирергә, бизнес нигеҙҙәренә өйрәтергә, консультация бирергә әҙер. Бер һүҙ менән әйткәндә, предприятие үҫешә алырлыҡ итеп эшләргә. Бының өсөн эшҡыуарлыҡҡа дәүләт ярҙамының махсус программалары бар", - тип билдәләнеләр Иглин районы хакимиәтендә. Билдәле булыуынса, “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” (национальный проект “Малое и среднее предпринимательство и поддержка индивидуальной предпринимательской инициативы”) милли проекты Рәсәй Президенты Владимир Путиндың май указы менән булдырылды. Фото: Иглин районы хакимиәте.