Мәсетле районында фажиғәле хәл теркәлгән. Оло Ыҡтамаҡ ауылындағы урындағы дауахананың ҡабул итеү бүлмәһендә Артем исемле ике йәшлек малай вафат булған. Малай һау-сәләмәт бала булған. Ул көндә лә өй буйлап йүгереп йөрөгән һәм уйнаған. Әммә кис көнө уның тыны ҡыҫылып, температураһы күтәрелгән. 11 ноябрҙә иртән борсолған ата-әсә улын дауаханаға алып киткән. Ләкин унда, уларҙың һүҙҙәренсә, Артемды хатта ҡарап та өлгөрмәгәндәр. Һөҙөмтәлә ҡатын хәлһеҙ сабыйы менән педиатрға юллана. Ул малайҙы ҡарап, ротавирус диагнозын ҡуя һәм температураны төшөрөү өсөн ибупрофен, танауына «Зиртек» һатып алырға ҡуша. Әсә бөтә кәрәкле дарыуҙарҙы һатып ала. Әммә кискә малайҙың хәле тағы ла насарлана төшә. Әсәһе йәнә сабыйын дауаханаға алып бара. Был юлы табиптар баланың ғүмерен ҡотҡарып өлгөрмәй. Вафат булғас ҡына, табиптар балала ике яҡлы пневмонияның ауыр төрө булыуын белдерә. Ата-әсә, сабыйҙың үлемендә табиптар ғәйепле, тип иҫәпләй. Улар хоҡуҡ һаҡлау органдарына мөрәжәғәт итергә ниәтләй. Кем белә, бәлки, сабыйҙың сире ваҡытында асыҡланһа, ул тере лә ҡалыр ине. Фото: социаль селтәрҙән.